उत्तर कोरियाले युक्रेनमा मस्कोको युद्धलाई सहयोग गर्न ‘ठूलो स्तरमा’ सैन्य तैनाथी पठाउने निर्णय गरेको सोलको गुप्तचर निकायले बताएको छ । निकायका अनुसार एक हजार पाँच सय विशेष बलले पहिले नै रुसको सुदूरपूर्वमा प्रशिक्षण लिइरहेको उल्लेख गरेको छ ।
पहिलो तैनाथी देखाउने विस्तृत उपग्रह तस्बिरहरू सार्वजनिक गर्दै राष्ट्रिय गुप्तचर सेवा (एनआइएस)ले उत्तर कोरियाले रुसलाई मद्दत गर्न हजारौँ सैनिक पठाउने निर्णय गरेको जनाएको छ ।
‘एनआइएसले अक्टोबर ८ देखि १३ सम्म उत्तर कोरियाले रुसी नौसेनाको परिवहन जहाजमार्फत आफ्नो विशेष बलहरूलाई रुसमा ओसारेको पत्ता लगाएको छ, यसले युक्रेनमा रुसको युद्धमा उत्तर कोरियाको सैन्य सहभागिताको सुरुआत पुष्टि गर्दछ’, एनआइएसले भनेको छ ।
एनआईएसका अनुसार धेरै रुसी ल्यान्डिङ जहाज र फ्रिगेटहरूले पहिलो दस्ताका सैनिकहरूको ढुवानी पहिले नै पूरा गरिसकेका छन्, तिनीहरू हाल रुसको सुदूर पूर्वका सैन्य अड्डाहरूमा तैनाथ छन् । ‘विशेष बलका सैनिकहरू जलवायु अनुकूलन तालिम पूरा गरेपछि (युक्रेन द्वन्द्वको) अग्रपङ्क्तिमा तैनाथ हुने अपेक्षा गरिएको छ’, एनआइएसले भनेको छ । सैनिकहरूलाई रुसी सैन्य वर्दी र रुसी निर्मित हतियारहरू दिइएको छ ।
‘यो उत्तरकोरियाली सैनिकहरूलाई रुसी सैनिकहरू जस्तै देखाएर उनीहरू उत्तर कोरियाली सैनिक हुन् भन्ने तथ्यलाई लुकाउने प्रयास हो जस्तो देखिन्छ’- एनआइएसको तर्क छ ।
एनआइएसका अनुसार छिट्टै थप सैनिकहरू पठाइने सम्भावना छ र उत्तरले करिब १२ हजार सैनिक पठाउन सक्ने अनुमान गरिएको छ ।
तोपगोला, क्षेप्यास्त्र
प्योङयाङ र मस्को दोस्रो विश्वयुद्धपछि उत्तर कोरियाको स्थापना भएदेखि नै सहयोगी रहेका छन् र रुसको सन् २०२२ को युक्रेन आक्रमणपछि झन् नजिक भएका छन् । उत्तर कोरियाली नेता किम जोङ उनले युक्रेनमा प्रयोगका लागि हतियार पठाइरहेको सोल र वासिङ्टनले लामो समयदेखि दाबी गर्दै आएका छन् ।
रुसी राष्ट्रपति भ्लादिमिर पुटिनले जुनमा प्योङयाङको दुर्लभ भ्रमण गरेका थिए । भ्रमणका क्रममा दुई देशले पारस्परिक रक्षा सन्धिमा हस्ताक्षर गरेका थिए । यसले थप हतियार हस्तान्तरणको अटकलबाजी बढाएको छ र सन्धिले दुवै देशमा संयुक्त राष्ट्रसङ्घका प्रतिबन्धहरूको उल्लङ्घन गर्दछ ।
उत्तरले ‘गत अगस्टदेखि रुसलाई १३ हजारभन्दा बढी कन्टेनर बराबरको तोपगोला, क्षेप्यास्त्र, ट्याङ्क विरोधी रकेट र अन्य घातक हतियारहरू’ प्रदान गरेको एनआइएसले शुक्रबार बताएको छ ।
युक्रेनका राष्ट्रपति भोलोदिमर जेलेन्स्कीले बिहीबार खुफिया रिपोर्टहरूलाई उद्धृत गर्दै उत्तर कोरियाले किएभ विरुद्धको लडाइँमा रुसलाई समर्थन गर्न १० हजार सैनिकलाई प्रशिक्षण दिइरहेको बताएका थिए ।
प्रतिक्रिया