हजारौँ टन तेल समुद्रमा चुहिएपछि र, किनारहरूमा ५० किलोमिटर क्षेत्र प्रदूषित भएपछि रूसले सफाइ अभियान विस्तार गरेको छ । यो घटना तेल ट्याङ्कर जहाजहरू एउटा आँधीका कारण दुर्घटनाग्रस्त भएपछि भएको थियो ।

एउटा पुरानो रूसी तेलट्याङ्कर टुक्रिएर डुबेको थियो भने अर्को मस्को-एनेक्स्ड क्रिमिया र दक्षिणी रुसको क्रास्नोडार क्षेत्रबीचको आजोभ र कृष्ण सागरलाई जोड्ने जलसन्धिमा रोकिएको थियो ।

रुसको आपत्कालीन मन्त्रालयले बुधबार (१८ डिसेम्बर) अनपा रिसोर्टबाट उत्तरमा टेमरुक बन्दरगाहसम्म ४९ किलोमिटर समुद्र तट सफा गर्ने र कूल ७० किलोमिटर समुद्र तटमा गस्ती गर्ने काम गरिरहेको बताएको छ ।

दुई ट्याङ्करले करिब नौ हजार टन तेल बोकेको र स्याटेलाइट अनुगमनले करिब तीन हजार टन तेल चुहिएको देखाएको सरकारी समाचार एजेन्सी तासले जनाएको छ ।

क्रिमियन समुद्री अनुसन्धानकर्ता सर्गेई स्टानिचनीलाई उद्धृत गर्दै तासले स्याटेलाइट तस्बिरहरूले डुबेको ट्याङ्करबाट अझै पनि तेल चुहिएको देखाएको रिपोर्ट गरेको छ । तीव्र बतासले तेललाई दक्षिणी रुसको समुद्र तटतिर धकेलिरहेको छ ।

करिब ९० हजार जनसङ्ख्या भएको अनपाको समुद्रीतट रिसोर्टले आपत्कालीन अवस्था घोषणा गरेको छ । रुसी आपत्कालीन अवस्था मन्त्रालयले स्वयंसेवक र आपत्कालीन कामदारहरूको सङ्ख्या बढेर दुई हजार सात सय पुगेको जनाएको छ । तिनीहरूले समुद्र तटबाट कालो तेल निकाल्दै प्लास्टिकको बोरा र खन्ने ट्रकहरूमार्फत तहलगाएका थिए ।