सुडानको पश्चिमी डार्फर क्षेत्रमा सेनाद्वारा गरिएको हवाई हमलामा सयौँ मानिसहरू मारिएको एक सुडानी युद्ध निगरानी समूहले आरोप लगाएको छ ।

सेनाको लडाकु विमानहरूले ‘उत्तरी डार्फरको तोरा बजारमा अन्धाधुन्ध हवाई आक्रमण गरेको, सयौँ नागरिक मारेको र दर्जनौँलाई गम्भीर रूपमा घाइते बनाएको’ सो समूहले जनाएको छ ।

डार्फरमा दूरसञ्चार अवरोधका कारण हमलाको सठिक समय र क्षतिबारे स्वतन्त्र रूपमा पुष्टि गर्न नसकिएको एएफपीले जनाएको छ ।

सन् २०२३ अप्रिलदेखि द्वन्द्वमा पारामिलिट्री र्‍यापिड सपोर्ट फोर्स (आरएसएफ)सँग लडिरहेको सेनाले यसबारेमा तत्काल टिप्पणी नगरेको बताइएको छ ।

सुडानमा लामो समयदेखिको युद्धले दशौँ हजार मानिसको ज्यान लिएको छ, एक करोड २० लाखभन्दा बढीलाई विस्थापित गरेको छ र विश्वको सबैभन्दा ठूलो भोकमरी र विस्थापनको सङ्कट सिर्जना गरेको छ ।

फ्रान्सको आकारको विशाल क्षेत्र डार्फरले युद्धको सबैभन्दा खराब हिंसाको सामना गरेको छ । हिंसामा नागरिक क्षेत्रहरूमा ब्यारेल बमको रिपोर्ट, अनिकाल प्रभावित विस्थापन शिविरहरूमा अर्धसैनिक आक्रमण र उग्र जातीय हिंसा समावेश छ ।

यद्यपि आरएसएफले डार्फरमा अत्यधिक सुसज्जित ड्रोनहरू तैनाथ गरेको छ । नियमित रूपमा क्षेत्रभरि आरएसएफ स्थानहरूमा आक्रमण गर्दै सेनाले आफ्नो लडाकु विमानहरूको साथ आकाशमा वर्चश्व कायम राखेको छ ।