बुधबार (७ जेठ) म्याद थप गरेर ल्याउने क्रममा जिल्ला प्रहरी परिसर काठमाडौंको गेटबाट भागेका एक थुनुवालाई प्रहरीले असनबाट पक्राउ गरेको छ ।

जिल्ला प्रहरी परिसर काठमाडौंका प्रवक्ता, प्रहरी उपरीक्षक अपिलराज बोहराका अनुसार दोलखाको बैदेश्वर गाउँपालिका-१२ घर भइ काठमाडौं महानगरपालिका-२४ नरदेवी बस्ने वर्ष २४ का निशान परियार फरार हुनेक्रममा पक्राउ परेका हुन् । रहेका छन् ।

अभद्र व्यवहार कसुरमा जिल्ला प्रशासन कार्यालय काठमाडौंबाट म्याद थप गरी ल्याउने क्रममा उनी बुधबार १२ः२१ बजेको समयमा जिल्ला प्रहरी परिसर, काठमाडौंको गेटनजिकबाट भागेका थिए । खोजतलासमा खटिएको प्रहरी टोलीले उनलाई काठमाडौं महानगरपालिका-२४ असनको याट्खा टोलबाट बुधबार साँझ १८ः१८ बजे लुकीछिपी बसेको अवस्थामा पक्राउ गरेको हो । थुनुवा फरार भएको बारे थप अनुसन्धान भइरहेको प्रहरीको भनाइ छ।

गत वैशाख ३१ गते परियारलाई काठमाडौं महानगरपालिका-१५ चमतीबाट पक्राउ गरी अभद्र व्यवहार कसुरमा प्रहरी वृत्त स्वयम्भूबाट अनुसन्धान भइरहेकामा म्याद थपका लागि जिल्ला प्रशासन कार्यालय काठमाडौ लगिएको थियो ।