फेक ‘रेस्क्यु’मा संलग्न अर्का एक जनालाई प्रहरीले पक्राउ गरेको छ । प्रहरीको केन्द्रीय अनुसन्धान ब्युरो (सिआइबी)ले नेपालको उच्च हिमाली क्षेत्रमा पदयात्राका क्रममा स्वास्थ्य समस्यामा परेका विदेशी पर्यटकको उद्धार गरेको देखाइ बिमा रकम दाबी गरी ठगी गर्ने सिन्धुपाल्चोक सोलु दूधकुण्ड नगरपालिका-१ का ५० वर्षीय पासाङ शेर्पालाई बुधबार पक्राउ गरेको हो ।

ब्युरोका प्रवक्ता, एसएसपी शिवकुमार श्रेष्ठले पदयात्राका क्रममा स्वास्थ्य समस्यामा परेका विदेशी पर्यटकको उद्धार गरेको देखाइ बिमा रकम दाबी गरेको आरोपमा शेर्पालाई पक्राउ गरेको जानकारी दिएका छन् । पक्राउ शेर्पाले पानोरमा हिमालय ट्रेकिङ एण्ड एक्स्पिडिसन प्रालिमार्फत नक्कली कागजात बनाइ बिमा रकम ठगी गरेको अनुसन्धानमा खुलेको प्रवक्ता श्रेष्ठको भनाइ छ ।

प्रहरीले यसअघि पनि फेक रेस्क्युमा संलग्न भएको आरोपमा १० जना पर्यटन व्यवसायी तथा अस्पतालको सञ्चालकलाई पक्राउ गरिसकेको छ । अन्तरराष्ट्रिय क्षेत्रमा नेपालको राष्ट्रिय स्वाभिमान, प्रतिष्ठा र गरिमामा आँच आउने कार्य गरे गराएकाले मुलुकी अपराध संहिता २०७४ को दफा ५१ राष्ट्रहित प्रतिकूल काम गर्न नहुने समेतको कसुर तथा सङ्गठित अपराध निवारण ऐन, २०७० अनुसारको कसुरमा संलग्न भएको आरोपमा उनीहरुलाई पक्राउ गरिएको हो ।

पक्राउ परेका शेर्पालाई जिल्ला अदालत काठमाडौंबाट म्याद थप गरी अनुसन्धान भइरहेको ब्युरोले जनाएको छ ।