• _{^{के. कार्की, रामधुनी (सुनसरी)}}

सुनसरीको ऐतिहासिक तथा धार्मिक महत्व बोकेको रामधुनी मन्दिरका महन्त कासिदास उदासी अहिले गम्भीर बिरामी अवस्थामा रहेका छन् । विडम्बना के भने, आफ्नो सम्पूर्ण जीवन यही मन्दिरको सेवा, संरक्षण र धार्मिक परम्परालाई जोगाउन समर्पित गरेका व्यक्तिलाई आज उपचारका लागि आवश्यक सहयोगसमेत सहज रूपमा उपलब्ध हुन सकेको छैन ।

स्थानीयहरूका अनुसार, महन्त उदासीले वर्षौंदेखि व्यक्तिगत स्वार्थभन्दा माथि उठेर रामधुनीको धार्मिक प्रतिष्ठा कायम राख्न महत्वपूर्ण भूमिका खेल्दै आएका थिए । तर अहिले उहाँको स्वास्थ्य अवस्था अत्यन्त नाजुक हुँदा पनि सम्बन्धित निकायबाट अपेक्षित पहल नदेखिएको भन्दै जनस्तरमा आक्रोश बढ्न थालेको छ ।

विशेषगरी रामधुनी मन्दिर विकास समितिप्रति प्रश्न उठिरहेको छ । स्थानीयवासीको आरोप छ कि समितिले महन्तको उपचारका लागि पर्याप्त सहयोग र जिम्मेवारी देखाएको छैन ।

एक स्थानीयले आक्रोश व्यक्त गर्दै भने, ‘जसले आफ्नो पुरै जीवन रामधुनीका लागि अर्पण गर्नुभयो, आज उहाँ नै संकटमा हुँदा चुप लागेर बस्नु केवल लापरवाही होइन, नैतिक असफलता हो ।’

यो घटनाले केवल एउटा बिरामी महन्तको अवस्था मात्र देखाउँदैन, यसले धार्मिक संस्थाहरूको मानवीय दायित्वमाथि गम्भीर प्रश्न उठाएको छ । मन्दिरको नाम र प्रतिष्ठाबाट लाभ लिनेहरू धेरै भए पनि, सेवा गर्ने व्यक्तिको दुःखको घडीमा साथ नदिने प्रवृत्तिले समाजमा नकारात्मक सन्देश गएको स्थानीयको भनाइ छ ।

धार्मिक आस्थाको केन्द्र मानिने रामधुनीसँग जोडिएका हजारौँ श्रद्धालु र स्थानीयले अहिले एउटै प्रश्न सोधिरहेका छन्- ‘जीवनभर सेवा गर्ने व्यक्तिलाई संकटको बेला कसले साथ दिने ?’

यस विषयमा सरोकारवाला निकायले तत्काल ध्यान दिएर महन्त कासिदास उदासीको उपचार तथा आवश्यक सहयोग सुनिश्चित गर्नुपर्ने माग स्थानीयस्तरबाट उठिरहेको छ ।