‘बेल्जियममा नेपाली व्यवसायीको १८ वर्ष र नयाँ नेतृत्वको अग्निपरीक्षा’

• ^{_{विशेष सम्वाददाता, युरोप}} 

परदेशको भूमिमा आफ्नो पहिचान र अस्तित्व स्थापित गर्नु कुनै पनि समुदायका लागि सजिलो यात्रा होइन । युरोपको मुटु बेल्जियममा नेपालीहरूको उपस्थिति र त्यहाँ उनीहरूले खडा गरेको व्यवसायिक साम्राज्यको कथा पनि उत्तिकै सङ्घर्षपूर्ण छ । सन् २००६ मा एउटा सानो समूहबाट सुरु भएको ‘नेपाली व्यवसायी संघ बेल्जियम’ (NEBAB) आज १८ वर्षको वयस्क उमेरमा प्रवेश गरेको छ। हालै सम्पन्न ८औँ अधिवेशनले कासी दनैको नेतृत्वमा नयाँ कार्यसमिति चयन गरेसँगै बेल्जियमको नेपाली समुदायमा एकातर्फ उत्साह छ भने अर्कोतर्फ यो नेतृत्वले लिने दिशाप्रति गहन बहस पनि सुरु भएको छ । 

इतिहास र विरासत :

सन् २००६ को त्यो समय, जहाँ न भाषाको सहजता थियो, न त स्थानीय कानुनको ज्ञान । सिपी भट्ट र मदन दवाडी जस्ता अग्रजहरूले एउटा सपना देखे- ‘नेपाली व्यवसायीहरूलाई एउटै टेबुलमा ल्याउने ।’ त्यही सपनाको जगमा उभिएर निवर्तमान अध्यक्ष चिरन खवासले संस्थालाई प्रतिष्ठित बनाउन महत्वपूर्ण भूमिका खेल्नुभयो । सुरुमा फाट्टफुट्ट खोलिएका रेस्टुरेन्टहरूलाई संगठित गर्दै आज ४०० भन्दा बढी व्यवसायीहरूलाई एउटै छातामुनि ल्याउनु नेबाबको सबैभन्दा ठूलो उपलब्धि हो ।

विविधता र नयाँ टोली :

कासी दनैको नेतृत्वमा बनेको १८ सदस्यीय टोली समावेशी र सन्तुलित देखिन्छ। लुभेनदेखि एन्तवेरपेनसम्मका व्यवसायीलाई समेट्नुले संस्थाको क्षेत्रीय प्रभावलाई बलियो बनाएको छ । रमेश दाहाल, बाबुराम शर्मा र राजेन्द्र कार्की जस्ता उपाध्यक्षहरू, भुवन सुवेदी र राज पुरी जस्ता सचिवालयका सदस्यहरू र अन्य सक्रिय सदस्यहरूको अनुभव र जोसको संगमले यो टोलीलाई बलियो त बनाएको छ, तर टिमको असली शक्ति ‘कागजमा’ होइन ‘कार्यक्षेत्रमा’ देखिनुपर्ने चुनौती छ । अधिवेशनले निर्वाचित गरेका सबै टिमको नामावली यसप्रकार छ :

नेतृत्व : कासी दनै (अध्यक्ष)

उपाध्यक्ष त्रय : रमेश दाहाल, बाबुराम शर्मा र राजेन्द्र कार्की

सचिवालय : भुवन सुवेदी (महासचिव), दिपेश सुवेदी (सचिव), रिचा गुरुङ (महिला सचिव) र राज पुरी (कोषाध्यक्ष)।

सदस्यहरू : देबु श्रेष्ठ (लुभेन), उमेश घिमिरे (एन्तवेरपेन), राजु थापा, भरत जंग क्षेत्री, कुल बहादुर कार्की र सरोज आचार्य।

संरक्षक/परामर्शदाता : निवर्तमान अध्यक्ष चिरन खवास (आमन्त्रित सदस्य)।

बाँकी क्षेत्रीय सदस्य र सहकोषाध्यक्ष कार्यसमितिले मनोनित गरेपछि यो १९ सदस्यीय पूर्ण टिमले पूर्णता प्राप्त गर्नेछ ।

आर्थिक कूटनीति र राष्ट्रियता :

नेबाब केवल एउटा पेशागत संगठन मात्र होइन, यो बेल्जियममा नेपालीहरूको ‘आर्थिक कूटनीति’ (Economic Diplomacy) को मेरुदण्ड पनि हो । नेपाल फेस्टिभलमार्फत बेल्जियन नागरिकलाई नेपालको पर्यटन र बुद्धसँग जोड्नु, कोरोना महामारीका बेला व्यवसायीलाई आर्थिक राहत (Economic Package) का लागि सहजीकरण गर्नु र नेपाली पुँजीलाई नेपालकै जलविद्युतमा लगानी गर्न प्रेरित गर्नुले यो संस्थाको कद व्यवसायभन्दा माथि उठेको छ ।

पहाडजत्तिकै चुनौती :

नयाँ नेतृत्वका अगाडि आज पनि चुनौतीका पहाडहरू छन् । सबैभन्दा ठूलो चुनौती भनेको ‘दोस्रो पुस्ता’लाई संस्थामा आकर्षण गर्नु हो। नेपाली रेस्टुरेन्ट व्यवसायको परम्परागत दायराबाट बाहिर निस्केर सफ्टवेयर, रियल इस्टेट र आधुनिक सेवा क्षेत्रमा हात हालेका नयाँ युवाहरूलाई समेट्न सके मात्र संस्थाको भविष्य सुनिश्चित हुनेछ । साथै, साना कन्भिनियन्स स्टोरदेखि ठूला होटेल व्यवसायीसम्मको भावनालाई एउटै मालामा गाँस्नु कासी दनैका लागि अग्निपरीक्षा हुनेछ । यदि सबैलाई समेट्न सके यो समितिको प्रतिष्ठा आकाशिनेछ, नत्र यो अर्को एउटा नाम मात्रको समितिको रूपमा इतिहासमा सीमित हुनेछ ।

निष्कर्ष :

बधाई पदका लागि मात्र होइन, काम र परिणामका लागि पाउनुको अर्थ बेग्लै हुन्छ । १८ वर्षको यो विरासतलाई कासी दनैको नेतृत्वले कुन उचाइमा पुर्‍याउँछ, त्यो समयले बताउनेछ । तर, बेल्जियमको नेपाली डायस्पोराले अहिले खोजेको नेतृत्व यस्तो होस्- जसले भाषणमा होइन, व्यवसायीका साना-ठूला समस्या र राष्ट्रको आर्थिक समृद्धिमा ठोस योगदान पुर्‍याओस् । कार्यकालको सफलता पछि पाइने बधाई नै साँचो र दिगो बधाई हुनेछ ।