त्रिपुरेश्वर (काठमाडौं)स्थित राहदानी विभागअगाडि आत्मदाहको प्रयास गरी गम्भीर रूपमा घाइते भएका गणेश नेपालीको सम्पूर्ण उपचार खर्च सरकारले उपलब्ध गराउने भएको छ ।

हाल वीर अस्पतालमा उपचाररत नेपालीको थप तथा विशिष्टिकृत उपचारका लागि तत्कालै भारतको नयाँ दिल्लीस्थित ‘अखिल भारतीय आयुर्विज्ञान संस्थान’ लैजाने तयारी गरिएको जनाइएको छ ।

चिकित्सकसँगको परामर्श र अवस्थाको गम्भीरतालाई ध्यानमा राख्दै बिरामीलाई तत्काल भारत लैजान आवश्यक प्राविधिक तथा व्यवस्थापकीय तयारी चुस्त बनाउन प्रधानमन्त्रीको सचिवालयले निर्देशनदिएको छ ।

प्रधानमन्त्री बालेन्द्र साहको निर्देशनमा घाइते नेपालीलाई थप उपचारका लागि भारत लैजाने प्रक्रिया अघि बढाइएको बताइएको छ ।

ज्ञातव्य छ, राइड सेयरिङ एपमार्फत राइडरको काम गर्दै आएका मुगुका गणेश नेपालीले बिहीबार त्रिपुरेश्वरस्थित राहदानी विभागअघि शरीरमा पेट्रोल छर्किएर आत्मदाहको प्रयास गरेका थिए । राहदानी विभाग अघिल्तिर पार्किङ गरेको मोटरसाइकलमा महानगर प्रहरीले ‘व्हीललक’ गरिदिएपछि उनले बाइकबाटै पेट्रोल निकालेर शरीरमा आगो लगाएका थिए ।