फ्रान्सलाई ६–४ गोलअन्तरले पराजित गर्दै इङ्ल्यान्डले फिफा विश्वकप २०२६ को तेस्रो स्थान हासिल गरेको छ । तेस्रो स्थानका लागि मियामी स्टेडियममा भएको खेलमा दुवै टोलीले आक्रामक फुटबल प्रदर्शन गरेका थिए ।

इङ्ल्यान्डले खेलको तेस्रो मिनेटमै डिक्लेन राइसको गोलबाट अग्रता लिएको थियो भने त्यसपछि १८औँ मिनेटमा एज्री कोन्साले र बुकायो साकाले ३७औँ मिनेटका साथै पहिलो हाफको इन्ज्युरी समयमा दुई गोल थप्दै पहिलो हाफमै इङ्ल्यान्डलाई ४–० को बलियो अग्रता दिलाए ।

दोस्रो हाफमा फ्रान्सले उत्कृष्ट पुनरागमन गर्ने प्रयास गर्‍यो । केलियन एम्बापेले ४८औँ र ६६औँ मिनेटमा दुई गोल गरे भने ब्राड्ली बार्कोलाले ५४औँ मिनेटमा गोल गर्दै खेललाई ४–३ को अवस्थामा पुर्‍याए । तर खेलको ८७औँ मिनेटमा इङ्ल्यान्डले पेनाल्टी पायो, जसलाई बुकायो साकाले गोलमा परिणत गर्दै आफ्नो ह्याट्रिक पूरा गरे र टोलीलाई ५–३ को अग्रता दिलाए ।

इन्ज्युरी समयमा उस्मान डेम्बेलेले फ्रान्सका लागि गोल गर्दै अन्तर ५–४ बनाए पनि त्यसको केही क्षणपछि जुड बेलिङ्घमले इङ्ल्यान्डका लागि शानदार गोल गर्दै खेल ६–४ मा टुंग्याए ।

यसरी इङ्ल्यान्डले फिफा विश्वकप २०२६ को तेस्रो स्थान सुरक्षित गरेको छ ।

यस्तै, फ्रान्सका कप्तान केलियन एम्बापेले यस खेलमा दुई गोल गर्दै प्रतियोगितामा आफ्नो गोल संख्या १० पुर्‍याएका छन् । उनले विश्वकप इतिहासमा आफ्नो २२औँ गोल पूरा गर्दै अर्जेन्टिनाका लियोनल मेस्सीको कीर्तिमानलाई उछिनेका छन् ।