नेपाल ओलम्पिक कमिटीअन्तर्गतको स्पोर्टस् फर अल कमिसनले लगनखेलस्थित नेपाल आर्मी खेलकुद तथा शारीरिक तालिम केन्द्रमा विभिन्न कार्यक्रम आयोजना गरी ओलम्पिक डे– २०१६ मनाएको छ । सो अवसरमा ओलम्पियनहरू पुष्पराज ओझा, विमला राना मगर, देवु थापा, संगीना वैद्य, जितबहादुर केसी, अमिरी यादव, उमेश मास्के, प्रवीण तुलाधर र मुकुन्द श्रेष्ठ ट्रयाकमा दौडेका थिए । टोलीको नेतृत्व गरेका केसीले ओलम्पिक गेम्स सूचक ओलम्पिक टर्च बोकेका थिए । उक्त टर्च केसीले कमिसनका अध्यक्ष विष्णुगोपाल श्रेष्ठलाई हस्तान्तरण गरेका थिए । लगत्तै सो टर्च श्रेष्ठले एनओसी अध्यक्ष जीवनराम श्रेष्ठलाई हस्तान्तरण गरे । विभिन्न विद्यालयका विद्यार्थीले नृत्य प्रस्तुत गरेका थिए भने गायक सत्यराज आचार्य र कुन्ती मोक्तानले गीत प्रस्तुत गरेका थिए ।

कार्यक्रमलाई सम्बोधन गर्दै मन्त्री मण्डलले ओलम्पियनहरू राष्ट्रको गौरव भएकाले उनीहरूलाई सम्मान गर्नुपर्ने बताउँदै खेलकुद र खेलाडीविरोधीविरुद्ध सबै एकजुट भएर लड्नुपर्ने आवश्यकता औँल्याए । एनओसी अध्यक्ष श्रेष्ठले ओलम्पिकको मूल्य र मान्यतालाई सबै माझ पुर्‍याउन सके खेलकुदको गरिमा अझ बढ्ने बताउँदै ओलम्पिक डे सम्पूर्ण खेलाडीको उत्सव भएको धारणा व्यक्त गरे । कमिसनका अध्यक्ष श्रेष्ठ र राष्ट्रिय खेलकुद परिषद्का उपाध्यक्षसमेत रहेका एनओसीका महासचिव लामा टेन्डी शेर्पाले ओलम्पिकको शुरुआत र महत्त्वबारे चर्चा गरेका थिए । ओलम्पिक डेमा साताव्यापी कार्यक्रम आयोजना गर्ने क्रममा यसपटक विभिन्न राष्ट्रिय खेलकुद सङ्घ र विभिन्न संस्थाले खेलकुदलगायत विभिन्न ५७ कार्यक्रम आयोजना गरेका थिए ।