उमेरहदका कारण भानुप्रसाद आचार्य महालेखा परीक्षकबाट अवकाश हुनुभएपछि रिक्त हुन आएको पदमा करिब डेढ दर्जन उम्मेदवारको आवेदन परेको समाचार प्राप्त भएको छ । विभिन्न संवैधानिक पदहरूमा नियुक्तिका क्रममा भागबन्डा हुँदा नेपाली कांग्रेसको भागमा परेको महालेखा परीक्षकमा पूर्वसचिव भानुप्रसाद आचार्यको नियुक्ति भएको थियो । निर्वाचन आयोगको प्रमुख आयुक्तमा माओवादीनिकटका अयोधीप्रसाद यादवको नियुक्ति भएको छ भने विभिन्न मुलुकका राजदूत र न्यायाधीशहरूको नियुक्ति प्रस्ताव गर्दा एमालेले झन्डै नब्बे प्रतिशत आफ्नो पार्टी समर्थकहरूलाई मौका दिएको छ । महालेखा परीक्षकमा पनि एमालेले आफ्ना समर्थक टंकमणि शर्मा र जयमुकुन्द खनालमध्ये एकलाई नियुक्त गर्ने सोच बनाएको छ । त्यस्तै, विश्वप्रकाश पण्डित र युवराज भुसाल कांग्रेसको कोटाबाट महालेखा परीक्षक बन्ने लाइनमा छन् । पण्डित देउवानजिकको मानिन्छन् भने भुसाल रामचन्द्र पौडेलका सम्धी हुन् ।
त्यस्तै एमालेका तर्फबाट कर फस्र्योट आयोगमा बसी रातारात अर्बपति बन्ने मौका पाएका चार्टर्ड एकाउन्टेन्ट उमेश ढकालले पनि महालेखा परीक्षक बन्न आवेदन दिएका छन् । एमालेभित्रको एउटा पक्षले ढकाललाई महालेखा परीक्षक बनाउन लबिङ गरिरहेको छ । तर, एमालेले सक्यो भने टंकमणि शर्मा या जयमुकुन्द खनाललाई महालेखा परीक्षक बनाउने छ । सो पदमा आपूर्तिसचिव श्रीधर सापकोटाको पनि आवेदन परेको बुझिएको छ । हालसम्म कुनै पार्टीविशेषको मानिसका रूपमा नचिनिएका सापकोटालाई महालेखा परीक्षक बनाउन कुनै राजनीतिक दल या तिनका नेता लागिपर्ने देखिएको छैन । तर, दलहरूबीच सहमति बन्न सकेन र कुनै तटस्थ व्यक्तिलाई नियुक्ति दिनुपर्ने अवस्था आयो भने श्रीधर सापकोटाको चयन हुनसक्ने सम्भावना छ ।
प्रतिक्रिया