भारतले आफ्नो विकाससँगै छिमेकीको पनि विकास भएको हेर्न चाहेको नेपालका लागि भारतीय राजदूत रणजीत रायले बताएका छन् । भारतले सबैको साथ र सबैको विकास भन्ने अवधारणा बोकेको भन्दै राजदूत रायले यस्तो दाबी गरेका हुन् ।

कार्यक्रममा राजदूत रायले भने, ‘नेपालको उर्जा क्षेत्रमा पनि भारतले ठूलो मात्रामा लगानी गर्न थालेको छ, अहिले उर्जा संकट रहेकाले भारतबाट ५ सय मेगावाटसम्म विद्युत सप्लाई भएपनि भारतीय लगानीको अपरकर्णाली, पञ्चेश्वर र अरुण तेस्रो बनेपछि नेपालबाट भारत विद्युुत जानेमा ढुक्क छु ।’

भारतीय दूताबास, विकासफण्डको ५ करोडको आर्थिक लागतमा नेपालगञ्जमा बनेको फत्तेबाल आँखा अस्पतालमा ओपिडी, जनरल वार्ड र डाक्टर्स क्वाटरको मंगलबार शिलान्यास गर्दै राजदूत रायले यतिबेला तीव्र विकासको गति लिनुपर्ने बेला आएको बताए । भारतले आफ्नो विकासको गतिमा नेपाललाई पनि साथ लिएर जान चाहेको उनको जिकीर थियो । युवाको शिक्षा र स्वास्थ्यमा लगानी गर्दै उनीहरुलाई आफ्नो खुट्टामा उभिन सक्ने बनाउनु पर्ने जोड दिएका उनले युवामा गरेको लगानीले नै मुलुकको विकास हुने बताए । गरिबी र पछयौटेपन दुबै मुलुकको विकासको बाधक भएकोले यसलाई उन्मुलन गर्नका लागि भारत सहकार्यका साथ अघि बढ्न तयार रहेको राजदूतको भनाई छ ।

नेपालमा आँखा स्वास्थ्यको क्षेत्रमा हरेक वर्ष ५ करोड रुपैयाँको विकास बजेट सहयोग गर्दै आएकोमा यस वर्षदेखि कान र मधुमेह रोग उपचारका लागि समेत लागि पनि सहयोग थपेको भारतीय राजदूत रायले जानकारी दिए ।