कुनै पादरी एड्सपीडित हुनु आफैँमा उदेकलाग्दो कुरा हुन आउँछ, त्यसमाथि एड्सग्रस्त पादरीबाट पाँचदेखि दस वर्ष उमेर समूहका तीन दर्जन बालिकाको यौन शोषण हुनु थप विष्मयको विषय हो । यति मात्र होइन, यस्तो जघन्य अपराधमा संलग्न मेक्सिकोका पादरी जोस गार्सिया अल्ताफोलाई रोमको भेटिकनसिटी चर्चले कुनै कारबाही नगरी उन्मुक्ति दिएको छ । जब कि पादरी अल्ताफोले बालिकामाथि रेप गरेको अभियोग स्वीकार गरेका थिए । पीडित बालिकामध्ये एककी आमाले दोषी पादरीमाथि कारबाही हुनैपर्ने लिखित मागपत्र बोकेर भेटिकनसिटीका पोपसँग भेट्न खोज्दा पोपले ‘मामिला सुल्झिसकेको’ भन्दै भेट गर्न नमानेको सन्दर्भ यतिबेला चर्चामा छ । चर्चले स्थानीय प्रशासनसँग दह्रिलो गठबन्धन बनाएको कारण बालिका बलात्कारजस्तो जघन्य घटनामा समेत दोषी पादरीले उन्मुक्ति पाएको प्रसङ्गलाई बेलायतका ‘द सन’, ‘द डेली मेल’जस्ता अखबारले धज्जी उडाएर समाचार प्रकाशन गरेका छन् ।