नेपाल तेक्वान्दो संघका महासचिव दीपराज गुरुङविरुद्ध दर्जनौँ आरोप लगाउँदै तेक्वान्दोका मुख्य प्रशिक्षक ध्रुव गुरुङले गत साता राष्ट्रिय खेलकुद परिषदमा उजुरी दर्ता गराएको सन्दर्भ यतिबेला चर्चामा छ । उजुरीमा प्रशिक्षक गुरुङले तेक्वान्दोलाई मेनपावर एजेन्सीको रुपमा परिणत गरेको, खेलाडी र प्रशिक्षकको भत्ता नदिएको, प्रशिक्षकमाथि भेदभाव गरेको, १२औं दक्षिण एसियाली खेलकुदमा नेपाललाई स्वर्ण पदकविहीन गराउन परोक्ष तर अहम् भूमिका निभाएको र संघमा आर्थिक चलखेल गरेकोलगायत आरोप लगाउँदै कारवाहीको माग गरेका थिए । साथै दीपराज गुरुङले तेक्वान्दोमा तानाशाही भूमिका निर्वाह गरेको भन्दै त्यसविरुद्धमा आफु उजुरी दिन बाध्य भएको राखेपमा दिएको उजुरीमा उल्लेख गरेका छन् ।

तेक्वान्दोका मुख्य प्रशिक्षक ध्रुव गुरुङले उजुरी दर्ता गराएपछि सत्यतथ्य बुझ्न हालै राष्ट्रिय खेलकुद परिषद एक छानविन समितिको गठन गरेका छन् । पाँच सदस्य उक्त छानविन समितिको अध्यक्षमा राष्ट्रिय खेलकुद परिषदका सदस्य देवकुमार अधिकारी (बद्री) रहेका छन् । समितिका सदस्यहरूमा धनबहादुर बस्नेत (कानुनविज्ञ), बासुदेव आचार्य (प्रशासन विभाग प्रमुख), कुलबहादुर थापा (खेलकुद विकास विभाग) र नवीन उप्रेती (तालिम प्रशिक्षण विभाग प्रमुख, राखेप) रहेका छन् । १५ दिनभित्र छानविन गरी परिषदमा प्रतिवेदन पेश गर्न समितिलाई राखेपले निर्देशन दिएको छ । निश्पक्ष छानविनकर्ताको परिचय बनाएका अधिकारीले आफुले यो मुद्दामा पनि कुनै आग्रह–पूर्वाग्रह नराखि छानविन गरी प्रतिवेदन बुझाउने बताएका छन् ।

यसअघि राष्ट्रिय खेलकुद परिषदमा तेक्वान्दोका महासचिव दीपराज गुरुङले दोहोरो नागरिकता लिएको विषयमा उजुरी परेको थियो । महासचिव गुरुङले भारत र नेपालवाट भिन्दाभिन्दै नाम राखेर नागरिकता लिएको प्रमाणसमेत पेश गरिएको थियो । त्यसपछि राखेपले उक्त दोहोरो नागरिकताको विवादको सम्बन्धमा परेको विवाद र उजुरीको बारेमा छानविनगरि परिषदमा प्रतिवेदन बुझाएको थियो । तर गुरुङले भिन्दाभिन्दै नामबाट नागरिकता लिएको प्रमाणित भए पनि छानविन समितिको प्रतिवेदन छानविनमा मात्रै सिमित भएको थियो । यो पटक पनि गुरुङमाथि दर्जनौं आरोपसहित राखेपमा उजुरी दर्ता भएको छ, र राखेपले छानविन समिति समेत बनाएको छ । अब छानविन समितिले बुझाएको प्रतिवेदन राखेपले छानविनमै सीमित राख्छ कि कारवाही गर्ने आँट प्रदर्शन गर्छ, प्रतीक्षाको विषय बनेको छ ।