चिकित्साशास्त्र अध्ययन संस्थान (आइओएम) त्रिवि शिक्षण अस्पतालका चिकित्सक प्रा.डा. गोविन्द केसीले ११ औँ आमरण अनसन थालेको आज (बुधबार) तीन दिन भएको छ ।  अनसनको तेस्रो दिन बुधबार उनी आफ्नो अवस्था ठिक छ भन्न नमिल्ने र धेरै बेठिक पनि नभएको बताएका छन ।

तर, उनले केही कमजोर महसुस भने भएको बताए । तर, अब त उनको शरीर अनशसनका लागि तयार भइसकेको छ । ११ औं अनसन सुरु गर्नु केही अगाडिदेखि उनले हल्का खानेकुरा खाने गरिरहेका थिए । डा. केसीले अनसन बस्न मिल्छ कि मिल्दैन भनेर समय–समयमा चेकअप पनि गर्ने गरेका थिए ।

आफ्नो माग संसदमा पुगेको १ वर्ष हुँदा पनि केही अत्तोपत्तो नभएकोमा उनले आपत्ति जनाए । पहिलो पटक ४ दिन आमरण अनसन बसेका डा. केसी १० औँ पटक २२ दिन बसेका थिए । उनले भने, “अब त झन् रेकर्ड नै तोडिन्छ, अघिल्लो पटक २२ दिन बसेँ । अब त माग पस्रा भएन भने त्यो भन्दा धेरै दिन हुन सक्छ ।” अनसन बस्न आत्मबल र आत्मशक्ति महत्वपूर्ण हुने उनी बताउँछन् ।

तीन दिनसम्म पनि सम्बन्धित पक्षले कुनै चासो नदेखाएको दुखेसो केसीले गरे । “मैले स्वास्थ्य सुधार र विद्यार्थीकै लागि यसो गरेको हुँ । पढाइ र बिरामीलाई बाधा हुँदैन, केही बन्द भएको छैन । तैपनि कसैले वास्ता नै गर्दैनन्, सम्बन्धित पक्ष नै माग पूरा गर्न चाँहदैन,” उनले भने, “आजसम्म जुनसुकै काम जनताकै दबाबमा भएको छ त्यसैले यो माग पनि पूरा हुनेमा विश्वस्त छु ।”

केसीले चिकित्सा शिक्षा ऐन छिटो ल्याउनुपर्ने र संस्थानमा तत्काल सहायक डिन नियुक्त गर्नुपर्ने प्रमुख माग राख्दै अनशन सुरु गरेका हुन् । शिक्षण अस्पताल महाराजगञ्जको गणेशमानसिंह भवनमा अनशन सुरु गरेका केसीले सरकारले यसअघि गरेका सम्झौता कार्यान्वयन गर्न असार ३१ गतेसम्मको समयावधि दिएका थिए ।

अनसन बस्दा गाह्रो हुन्छ भनेरै अरु बेला पनि खाना नखाएको उनले बताए । “मलाई भोकको कुनै फिलिङ नै हुँदैन । अनसन बस्दा स्वास्थ्य धेरै बिग्रिन थाल्यो भने ३ दिनदेखि नै स्लाइन पानी चाहिन्छ । तर मलाई अहिले चाहिएको छैन,” उनले भने, “५–६ दिनसम्म त त्यत्तिकै बस्न मिल्छ । त्यो स्लाइन पानीमा नुनपानी बाहेक केही हुँदैन, त्यसले केही इनर्जी दिँदैन ।” यसअघिका अनसनमा मेडिकल टिमले स्लाइन पानीमा ग्लुकोज हालेर दिनुपर्छ भनेको भए पनि आफूले नलिएको उनले बताए ।

केसीका मागहरू:

-तत्काल माथेमा प्रतिवेदन अनुरुप हामीले दिएका सुझावसहित चिकित्सा शिक्षा ऐन पारित गरियोस् ।

-चिकित्सा शिक्षा क्षेत्रमा भएका अनियमितता रोक्न निम्न काम गरियोस् ।

-सरकारी निर्देशन र अदालतको आदेश अटेरी गर्ने मेडिकल कलेजको सम्बन्धन तत्काल खारेज गरियोस् ।

-अाइओएममा पदाधिकारी नियुक्त नगरेर अस्तव्यव्यस्त बनाउने, आइओएमका अधिकार खोसेर लैजाने तथा नाजायज रुपमा धेरै शुल्क कायम गर्ने त्रिवि पदाधिकारीलाई तत्काल बर्खास्त गरियोस् ।

-आइओएममा तत्काल डिनको सिफारिश अनुसार सहायक डिन र क्याम्पस प्रमुख नियुक्त गरियोस् ।

-आइओएमलाई विगतका सम्झौताअनुसार थप स्वायत्तता दिंदै विद्यार्थी भर्ना, शुल्क र सम्बन्धनसम्बन्धी अधिकार त्रिवि कार्यकारी परिषदबाट आइओएममा फिर्ता गरियोस् ।

-चिकित्सा शिक्षा आयोग नबनुन्जेलसम्म मेडिकल शिक्षाका सबै तहको शुल्क विश्वविद्यालयले नभई सरकारले तोक्ने व्यवस्था गरियोस् ।

-एमडी, एमएस र एमडीएस तहको शुल्क यही शैक्षिक सत्रदेखि लागू हुने गरी काठमाडौं विश्वविद्यालयमा जस्तै सबै निजी कलेजहरुका लागि २२ लाख कायम गरियोस् ।