स्वदेशमा बढ्दो बेरोजगारीको मौका छोप्दै वैदेशिक रोजगार व्यवसायी कम्पनीहरुले दैनिक ५० लाख रुपैयाँ कामदारहरुसंग ठगी गर्दै आएका छन् । रोजगारीका सिलसिलामा विदेश जाने नेपाली कामदारबाट दैनिक ५० लाख रुपैयाँ ठगी हुने गरेको पाइएको छ । म्यानपावर एजेन्सी र एजेन्टहरुले बढी रकम असुल्ने र नक्कली सम्झौतामा विदेश पठाउने भएकाले कामदार ठगीमा पर्ने गरेका छन् ।

वैदेशिक रोजगार विभागमा परेका उजुरी अनुसार चालू आर्थिक वर्षका १० महिनामा व्यक्तिगत (एजेन्ट) र संस्थागत (म्यानपावर एजेन्सी) ले कामदारको ८२ करोड ७५ लाख २९ हजार ५ रुपैयाँ ठगी गरेका पाइएको छ । यो उजुरी परेको मात्रै हिसाब गर्ने हो भने पनि यही रकमको आधारमा दैनिक २७ लाख ५० हजार रुपैयाँ भन्दा बढी ठगी हुने गरेको खुलेको छ । भने अझै धेरै ठगीएका कामदारहरु उजुरी दिने निकाय समेत थाहा नभएकाहरुको संख्या अत्याधिक रहेको छ ।

विभागको उजुरी तथा अनुसन्धान शाखामा रहेको उजुरीमध्ये म्यानपावर र एजेन्टबाट हुने ठगीकामात्र हाल सम्म ३ सय ७७ वटा उजुरीमा फरफारक गरि सकेको जनाएको छ । ३ सय ७७ उजुरीमा १४ करोड ६६ लाख ९१ हजार रुपैयाँ छ र यो रकम कामदारलाई दिएपछि उनीहरुले म्यानपावर र एजेन्ट विरुद्धको उजुरी फिर्ता लिइसकेको शाखाका निर्देशक नारायणप्रसाद रिमालले बताएका छन् । विभागले १ सय ६ उजुरीको आधारमा ३९ करोड ६६ लाख ८६ हजार ७ सय ३७ रुपैयाँ विगोसहित वैदेशिक रोजगार न्यायायधिकरणमा मुद्दा दायर गरेको छ ।

विभागमा परेका उजुरीमध्ये ७६ प्रतिशतको मुद्दा अहिलेसम्म कुनै प्रकृयामै गएको छैन । बैदेशिक रोजगारीका लागि दक्षिण अफ्रिका पठाइदिन्छु भन्दै धादिङको सिद्धलेकलेक गाउँपालिका वडा नम्बर ५ कुम्पुरका लक्ष्मणप्रसाद पन्तले छिमेकीकै ११ लाख रुपैयाँ ठगेर फरार भए । ठगिनेमा सिद्धलेक गाउपालिका वडा नम्बर ५ कै कुशल आलेमगर रहेका छन । राम्रो कमाइ हुने आसमा भएको १ रोपनी खेत नै बेचेर पन्तलाइ पैसा बुझाएका कुशल आलेको यतिबेला उठिबास लागेको छ ।

पन्तले सुरुमा टर्किको बिजनेस फार्ममा सेल्स ब्वाइ रुपमा पठाइदिने भन्दै तीन लाख लिएपछि टर्किमा द्वन्द भइरहेकाले टर्किको साटो दक्षिण अफ्रिका पठाइदिने बताउदै रकम लिएर भागेका छन् । पुरा पैसा दिएपछि पाँच महिना भारत लगेर झुलाएपछि बेपत्ता भएका पन्त काठमाडौको नैकापमा बस्दै आएपनि यतिबेला सम्पर्कविहीन भएका छन ।

गाउँमा रहेको एक रोपनी दुई आना खेत ६ लाख २५ हजारमा बेचेर थप पाँच लाख ऋण गरी पैसा बुझाएका आले अहिले पन्त बेपत्ता भएपछि समस्यामा परेका छन् । सुरु सुरुमा पैसा फिर्ता गर्छु भनेपनि पछि पछि धम्क्याउन थालेपछि आलेले पैसा फिर्ता दिलाइदिन माग गर्र्दै बैदैशिक रोजगार विभागमा गत वैशाख २५ गते नै उजुरी दिएका थिए । सो उजुरीमाथी समेत अहिले सम्म कुनैपनि सुनुवाइ नभएको गुनासो उनको गुनासो रहेको छ ।

आलेले धादिङ स्थित सुरक्षित आप्रवासन परियोजनामा पनि पैसा फिर्ता गराइदिन माग गर्दै उजुरी दिए । वैदेशिक रोजगारीमा समस्या परेका कामदारहरुको लागि सहयोगी भुमिका खेलिरहेको परियोजनाले ठगी गर्ने लक्ष्मण पन्तको विरुद्धमा पिपुल फोरम मार्फत वैदेशिक रोजागार विभागबाट जाहेरी दर्ता गराएको छ । विभागले महानगरीय प्रहरी कार्यालय अपराध अनुसन्धान महाशाखालाइ कसुरदार पक्राउ गरी उपस्थित गराइदिने भनेर पुर्जी समेत जारी गरेपनि फरार पन्तको विषयमा कुनै जानकारी फेला परेको छैन ।