नयाँ शक्ति पार्टीका संयोजक डा. बाबुराम भट्टराइले माओवादी केन्द्रका अध्यक्ष एवम् आफ्ना पूर्व–सहकर्मी प्रचण्डलाई ‘दिल्लीका शासकहरूको डिजाइनअनुसार काम गर्ने क्षणिक मोहोरा’को आरोप लगाएका छन् । नयाँ शक्तिबाट एकपछि अर्को गर्दै महत्वपूर्ण जिम्मेवारीमा रहेका व्यक्तिहरू पलायन भई अन्य दलतिर आकर्षित भएका र माओवादी पृष्ठभूमिका कार्यकर्ताहरू पनि माओवादी केन्द्रतिर फर्किने सम्भावना बढेको चर्चा चल्दै गर्दा डा. भट्टराईले एक विज्ञप्ति सार्वजनिक गर्दै प्रचण्डमाथि उल्लिखित गम्भीर आरोप लगाएका हुन् । चारबुँदै विज्ञप्तिमा उनले ‘नेपालका देशभक्त, वामपन्थी, प्रगतिशील धारलाई कमजोर पारेर काङ्ग्रेस र भारतपरस्त राजनीतिक शक्तिलाई बलियो पार्न प्रयोग गरिएका क्षणिक मोहोरा’ भन्दै प्रचण्डप्रति आक्रोश पोखेका छन् ।
पछिल्लो पटक आफ्ना अत्यन्त निकट मानिएका पार्टी संघीय परिषद सदस्य देवेन्द्र पौडेलसहित १५ जनाले पत्रकार सम्मेलन गरी पार्टीको विचार, नेतृत्व र कार्यदिशाका बारेमा असन्तुष्टि प्रकट गरेपछि भट्टराई रन्थनिएका थिए । त्यसलगत्तै एक प्रेस विज्ञप्तिमार्फत उनले ‘यस्ता अवाञ्छित क्रियाकलापबाट प्रभावित नहुन र अविचलित रही पार्टी उद्देश्य, कार्यक्रम र भावनाको रक्षा गर्न’ आफ्ना कार्यकर्तालाई आह्वान गरेका थिए । यसरी आफ्ना मान्छेहरू भड्किँदै जानुलाई उनले प्रचण्डको बहकावमा लागेको रूपमा बुझ्ने गरेका नयाँ शिक्तनिकट एक सदस्यले बताए ।
यसै पेरिफेरिमा बाबुराम भट्टराईले सार्वजनिक गरेका चार बुँदे वक्तव्य जस्ताको तस्तै :
साथीहरू, मैले शुरूदेखि प्रण गर्दै आएको छु र आज फेरि एकपटक जोड दिएर भन्न चाहन्छु–
१. नयाँ शक्ति र वैकल्पिक राजनीतिक अभियान एक्काइसौँ शताब्दीको वैश्विक आवश्यकता र नेपालको सङ्घीय लोकतान्त्रिक गणतन्त्र स्थापनापछिको ऐतिहासिक आवश्यकताको उपज हो ! कसैको लहडमा स्थापना गरिएको अर्को एउटा सनातनी पार्टी हैन ! यसले जनतामा जरो गाड्न केही समय लिनसक्छ ! त्यसैले धर्ती भासिए पनि वा आकाश खसे पनि म यो अभियानमा लागिरहनेछु ! कसैमा रौँ जति पनि शंका छ भने आजदेखि पूर्ण रूपमा ‘डिलिट’ गरिदिनुहोला !
२. १० बुँदे आरोपपत्र बहानावाजी मात्र हो ! त्यसका अगुवाहरूले माकेमा विलीन हुन सबै तयारी गरिसकेका छन् भन्ने मसँग भरपर्दो जानकारी छ । यदि हस्ताक्षरकर्ता कोही साथीहरू अझै भ्रममा हुनुहुन्छ भने समयमै सत्यतथ्य बुझेर आफ्नो कदम सच्याउनुहोला ! प्रचण्ड नेतृत्वको माके न वैकल्पिक राजनीतिक शक्ति बन्न सक्छ न त्यो यथास्थितिमा देशको नेतृत्वदायी शक्ति बन्ने कुनै सम्भावना छ ! प्रचण्ड त खालि दिल्लीका शासकहरूको डिजाइनअनुसार नेपालका देशभक्त, वामपन्थी, प्रगतिशील धारलाई कमजोर पारेर काङ्ग्रेस र भारतपरस्त राजनीतिक शक्तिलाई बलियो पार्न प्रयोग गरिएका क्षणिक मोहोरा मात्र हुन् ! यो म कुनै आवेगमा वा दुराशयवश भनिरहेको छैन, तथ्यका आधारमा भन्दैछु, जुन समयक्रममा पुष्टि हुनेछ ।
३. माओवादी पृष्ठभूमिका साथीहरूलाई कुनै पनि प्रकारले आतङ्कित नहुन म विनम्र आग्रह गर्दछु ! युद्धकालीन मुद्दा ब्युँताएर सबैलाई फसाइँदैछ त्यसैले सबै पूर्वमाओवादीहरू एक ठाउँमा आउनुपर्छ भन्ने भ्रम प्रचण्ड गुटले जबर्जस्त रूपमा छरिरहेछ ! त्यसमा कुनै सत्यता छैन ! नेपालको मौलिक शान्तिप्रक्रिया अब पछि फर्कन सम्भव छैन । किनकि त्यो पछि फर्कियो भने हिजो सत्तामा बस्ने र बल प्रयोग गर्नेहरू कोही पनि बच्नेछैनन् ! पूर्व माओवादी तर्फबाट म नै त्यतिबेलाको जनसरकार प्रमुख हुनुको नाताले त्यो जिम्मेवारी लिन तयार छु !
४. त्यसैले साथीहरू, यो चुनौति हामीलाई साँच्चै शुद्धीकरण गरेर नयाँ वैकल्पिक शक्तिमा रूपान्तरित हुने सुनौलो अवसर पनि हुनसक्छ ! यसलाई सामना गर्ने हिम्मत गरौँ ! म तपाईंहरूको साथमा निरन्तर रहनेछु !
– डा. बाबुराम भट्टराई
प्रतिक्रिया