राष्ट्रिय फोटो पत्रकार समूहले भिडियो र फोटो पत्रकारका हकमा सरकारले अत्यावश्यक समयमा विमानको व्यवस्था गर्नुपर्ने माग राखेका छन् । उक्त समुहले १७८ औँ विश्व फोटोग्राफी दिवसका अवसरमा आयोजीत कोणसभामा सहभागी फोटोपत्रकारहरुले सो माग गरेका हुन ।

फोटो पत्रकार समूहका अध्यक्ष धुव्र आलेले फोटोग्राफी दिवस फोटो पत्रकारका लागि मात्र नभएर सम्पूर्ण फोटोप्रति आस्था राख्ने व्यक्तिको भएको बताएका छन् । समूहका पूर्वअध्यक्ष कवीन्द्रमान शाक्यले फोटो पत्रकारको हकहितको रक्षा गर्दै नेपालको फोटो पत्रकारिताको व्यावसायिक विकास गर्न समूह स्थापना गरिएको बताए ।

भिडियो क्यामरा एशोसियसनका अध्यक्ष दिलीप थापा मगरले पत्रकारितामध्ये जोखिमको पत्रकारिता भिडियो तथा फोटो पत्रकारिता हो भन्दै भिडियो र फोटो पत्रकारका हकमा सरकारले अत्यावश्यक समयमा विमानको व्यवस्था गर्नुपर्ने बताए । त्रिवि रत्नराज्य लक्ष्मी क्याम्पस फोटो पत्रकारिताका शिक्षक मधुसूदन थापा, समूह कास्कीका अध्यक्ष इन्द्र पौडेल, पाल्पाका अध्यक्ष कृष्ण दर्नाललगायतले फोटो पत्रकारिताको विकासमा समूहले महत्वपूर्ण भूमिका खेलेको भन्दै आगामी दिनमा झन् अगाडि बढ्न शुभकामना दिएका थिए ।