स्थानीय तहको निर्वाचनमा एमालेको तर्फवाट बनेपा–६ मा वडा अध्यक्ष जितेका सचितानन्द केसीले आफू काभ्रेपलान्चोक खेलकुद विकास समितिको अध्यक्षसमेत भएको दाबी गरेपछि खेलकुदमा खैलाबैला मच्चिएको छ । केसीले वडा अध्यक्षमा निर्वाचित भएपछि पनि कानुनविपरीत खेलकुद विकास समितको अध्यक्षको रुपमा कार्य गर्दै आएका छन् ।

सर्वप्रथम स्थानीय तहको निर्वाचनमा उम्मेदवारी दिन जिल्ला खेलकुद विकास समितिको अध्यक्षबाट केसीले राजीनामा दिनुपथ्र्यो । तर राजीनामा नै नदिई उनी वडा अध्यक्षको उम्मेदवार बने । त्यतिले नपुगी केसीले समितिमा हस्तक्षेपसमेत गरे । खेलकुद विकास समितिबाट राजीनामा नै नदिई केसी कसरी वडा अध्यक्ष बने र त्यस विषयमाथि सरोकारवालाले किन छानबिन गरेन, यो अहिले खेलकुदमा चासोको विषय बनेको छ । कानुनी रुपमा उनी अब कताका अध्यक्ष पदका हकदार हुन्छन् ? कि दुबै पदबाट हात धुनुपर्ने हो ? त्यसको छिनोफानो हुनुपर्ने आवाज खेलकुदमा उठेको छ ।

सच्चितानन्द केसीले स्थानीय तहको निर्वाचनमा बनेपा वडा नम्बर ६ को अध्यक्ष पदमा विजयी भएपछि राष्ट्रिय खेलकुद परिषदले उक्त रिक्त समितिको अध्यक्षमा भक्तकुमारी लामालाई नियुक्त गरेको स्रोतले जनाएको छ । स्मरण रहोस्, लामा स्थानीय निर्वाचनमा एमालेको तर्फबाट पाँचखाल नगरपालिकाको उपमेयर पदमा उम्मेदवारी दिएर पराजित भएकी थिइन् ।

राखेप सदस्य सचिव विष्टले लामालाई काभ्रे जिल्ला खेलकुद समितिको अध्यक्षमा नियुक्ति गरे पनि लामाको नियुक्ति कागतमै सीमित बन्न पुगेको छ । लामाले अहिलेसम्म आफ्नो नियुक्ति पत्र समितिमा दर्ता गराउन सकेकी छैनन् । लामा बाहिर–बाहिर आफुलाई जिल्लाको खेलकुद अध्यक्ष भएको दाबी गर्दै हिँडे पनि केसीले कुर्सी नछोडेपछि रनभुल्ल परेकी छिन् ।