निर्वाचनको बेला दलीय तथा उम्मेदवारको प्रचारप्रसारमा बालबालिकाको प्रयोग गर्ने प्रचलनमा बढोत्तरी भएको परिवेशमा निर्वाचनसम्बन्धी गतिविधिमा कलिला बालबालिकाको प्रयोग हुन नदिनेसम्बन्धी प्रतिबद्धता पत्रमा सरोकारवाला निकायले हस्तारक्षर गरेका छन् । आगामी निर्वाचनलाई स्वच्छ, स्वतन्त्र र विश्वसनीय बनाउने भन्दै निजी विद्यालयका छाता संगठन तथा शिक्षा मन्त्रालय र शिक्षा विभागका प्रतिनिधिले सोमबार प्रतिबद्धता पत्रमा हस्ताक्षर गरेका हुन् ।

स्थानीय तहको आगामी असोज २ गते प्रदेश नम्बर २ मा र प्रतिनिधिसभा र प्रदेशसभाको मङ्सिरमा देशभर हुने निर्वाचनमा बालबालिकाको प्रयोग हुन नदिने सम्बन्धमा निर्वाचन आयोगले सरोकारवालासँग गरेको छलफलपछि उक्त प्रतिबद्धता पत्रमा हस्ताक्षर गरिएको हो ।

प्रतिबद्धतापत्रमा ‘मुलुकमा हुन गइरहेको तेस्रो चरणको स्थानीय तह एवं प्रदेशसभा र प्रतिनिधिसभा सदस्य निर्वाचन, २०७४ मा कलिला बालबालिकालाई कुनै पनि निर्वाचनको गतिविधिमा प्रयोग नगर्न÷नगराउन सबै राजनीतिक दलसँग हार्दिक अपिल गर्दछौँ’ भनिएको छ ।

स्वच्छ, स्वतन्त्र र विश्वसनीय निर्वाचन लोकतन्त्रको आधारशिला भएको हुँदा निर्वाचनले लोकतन्त्रको संस्थागत सुदृढीकरण गर्ने, शासनको सबलीकरण गर्दै सुशासनमा टेवा पु¥याउने विश्वव्यापी मान्यतालाई आत्मसात् गर्नुपर्ने जनाउँदै उनीहरुले सो प्रतिबद्धता पत्रमा हस्ताक्षर गरेका राससले जनाएको छ ।

प्रतिबद्धता पत्रमा अगाडि भनिएको छ– ‘हामी कुनै हालतमा हाम्रा कलिला बालबालिकालाई कुनै पनि राजनीतिक गतिविधिमा प्रयोग गर्न दिने छैनौँ भनी यो प्रतिबद्धता जाहेर गर्दछौँ । साथै हामीहरूले निर्वाचन आयोगले जारी गरेका निर्वाचन आचारसंहिताको अक्षरशः पालना गर्ने पूर्ण प्रतिबद्धतासमेत व्यक्त गर्दछौँ ।

प्रतिबद्धतापत्रमा हस्ताक्षर गर्नेहरुमा शिक्षा मन्त्रालयका सहसचिव सूर्यप्रसाद गौतम, अभिभावक सङ्घ नेपालका केशव पुरी, एन प्याब्सन कर्णबहादुर शाही र संगीता सिलवाल, हिसान नेपालका नवराज पाण्डे, केन्द्रीय बालकल्याण समितिका तारक धिताल, राष्ट्रिय मानव अधिकार आयोगका यज्ञप्रसाद अधिकारी र प्याब्सनका दीपिका रिमाल थापा रहेका छन् ।