पूर्व युवा तथा खेलकुदमन्त्री सत्यनारायण मण्डलको अध्यक्षतामा गठन भएको १३ औँ दक्षिण एसियाली खेलकुद प्रतियोगिता (साग)को मूल आयोजक समिति विघटन हुन लागेको मन्त्रालय स्रोतले जनाएको छ । बताइएअनुसार यसै साता उक्त मूल समिति विघटन गरेर युवा तथा खेलकुदमन्त्री राजेन्द्रकुमा केसीको अध्यक्षतामा नयाँसमिति गठन हुने छ ।

नेपालमा आयोजना हुने १३ औं सागलाई दृष्टिगत गर्दै मण्डलको अध्यक्षमा गठित मूल समिति विघटन गर्न लागिएको हो । १३ औं सागको सफल आयोजन लागि मूल समितिको प्रभावकारितालाई आत्मसात गर्दै मन्त्रालय यो कदम उठाउन लागेको बुझिएको छ ।

खेलकुदमन्त्री केसीको अध्यक्षतामा गठन हुने मूल आयोजक समिति समावेसी हुने पनि मन्त्रालय स्रोतले जनाएको छ । १३ औं सागको कार्य युद्धस्तरमा अगाडि बढाउनुपर्ने भएकोले मूल समितिको गठनसँगै उपसमिति गठन गरेर जिम्मेवारी दिइने भएको छ । १३ औं साग २०७५ सालमा नेपालमा आयोजना हुँदैछ ।

स्मरण रहोस्, अहिलेसम्म १३ औं सागको लागि नेपाल सरकारले कुनै तयारी गरेको छैन । सरकारले संसदमा प्रस्तुत गरेको आर्थिक वर्ष ०७४÷७५ मा १३ औं सागको लागि कुनै बजेट छुट्याइएको छैन ।