फ्रुटी सञ्चालक दुगड फरार

–रोशन कार्की

गुणस्तहिन पेयपदार्थ बिक्री वितरण गर्दै आएको दुगड सुमहमाथी कारबाही प्रकृया अधि बढाउने सहायक जिल्ला अधिकृतलाई जिम्मेवारीबाट हटाइएको छ ।  म्याद नाघेको म्यांगो पल्प (आँपको गुदी) प्रयोग गरी मानव स्वास्थ्यमा गम्भीर असर पार्ने फ्रुटी उत्पादन गर्दै बिक्री गर्दै आएको सोे उद्योगमा छापा मारी कारबाही अगाडी बढाएको थियो ।

उपभोक्ताको स्वास्थ्यलाई जोखिमबाट जोगाउन खोज्ने सहायक प्रजिअ प्रेमप्रसाद लुइँटेललाई उद्योगमा छापा मारेको चार दिनपछि अन्तरमन्त्रालय सरुवा गरिएको छ । म्याद नाघेको गुणस्तरहीन फ्रुटी बनाउँदै गरेको गोप्य सुराकीका आधारमा महानगरीय प्रहरी परिसर काठमाडौं र महानगरीय प्रहरी अपराध महाशाखाको सहयोगमा भदौ १२ गते सहायक प्रजिअ लुइँटेल सहितको टोलीले सतुंगलस्थित दुगड फुड एन्ड बेभरेज प्राइभेट लिमिटेडमा छापा मारेको थियो ।

                                                                              उद्योग सञ्चालक माल्चन दुगड

६ वर्षदेखि गृह मन्त्रालयका विभिन्न तहमा रहेर काम गर्दै आएका लुइँटेललाई फ्रुटी काण्डमा थप अनुसन्धान र कारबाही प्रक्रिया अघि बढाउन नदिन ‘सुनियोजित’ रूपमा गृहबाट संघीय मामिला तथा स्थानीय विकास मन्त्रालय सरुवा गरिएको छ ।  लुइँटेलले अनुसन्धान गरी कालोबजारी ऐन र मुलुकी ऐनको ठगी महलअन्तर्गत उक्त उद्योगका सञ्चालक माल्चन दुगडलाई नै अधिकतम कैद र बिगोबमोजिम जरिवाना गराउने तयारी गरेका थिए ।

फ्रुटी काण्डलाई प्रभावहीन बनाएर दोषी व्यवसायीलाई उन्मुक्ति दिन लुइँटेललाई जिम्मेवारीबाट हटाएर भदौ १६ मा स्थानीय विकासमा पठाइएको खुलेको छ ।  यसअघि पनि उपभोक्ता सम्बन्धी मुद्दामा व्यवसायीलाई उन्मुक्ति दिने नियतले व्यवसायी र राजनीतिकर्मीको मिलेमतोमा धारा तेलको मूल्य प्रकरणमा तत्कालीन प्रजिअ एकनारायण अर्याल र मिठाईमा जनावरको बोसो मिसावट प्रकरणमा तत्कालीन प्रजिअ लक्ष्मी ढकालको सरुवा गरेर मुद्दालाई प्रभावहीन बनाइएको थियो ।

सहायक सिडिओ बजार संरक्षक अधिकृत हुने व्यवस्था रहेको छ । सोही हैसियतमा सूचनाका आधारमा उद्योगमा छापा मारेर फ्रुटीमा प्रयोग हुने म्याद नाघेको म्यांगो पल्पको चार सय २६ वटा सिल प्याक ड्रमसहित करिब डेढ लाख तयारी फ्रुटीको पोका बरामद गरिएको थियो । छापा मारेकै दिन अनुगमन टोलीले उद्योग बन्द गराएको थियो । म्याद नाघेको कच्चा पदार्थलाई मन्द विष मानिन्छ ।

डेढ महिनाअघि म्याद नाघेको नेचुरल टोटापुरी म्यांगो पल्प छापा मार्ने क्रममा भेटिएको थियो । सन् २०१५ को जुलाईमा तयार भएको र दुई वर्ष म्याद भएको उक्त म्यांगो पल्पको प्रयोग गरी उद्योगले धमाधम फ्रुटी जुस तयार गरेर बजारमा पठाउँदै आएको थियो । लुइँटेलले पछिल्लो समय सुर्तीजन्य, मदिराजन्य, रात्रिकालीन क्लब, तथा मिसावटलगायत विकृति रोक्न विशेष अप्रेसन सुरु गर्न लागेका थिए । सोही अप्रेसन क्रममा दुगडको उद्योगमा उनको टोलीले छापा मारेको थियो ।

दुई वर्षअघि पनि सो उद्योगले गुणस्तहिन पेयपदार्थ बिक्री गरेको ठहर गर्दै कारबाही गरेको थियो ।  यसरी आफु कारबाहीबाट बच्न सो समुहले मोटो रकमको थैली समेत सम्बन्धित निकायमा पु¥याएको आरोप स्रोतको रहेको छ । सो थैलीलाई सहायक प्रजिअ लुइटेलले लिन नमानेपछि एकाएक गृहमन्त्रालयको दवावमा सामान्य मन्त्रालयले अन्तर विभागीय स्थानमा सरुवा गरिएको छ । सो मुद्दा नमिले सम्म दुगड लुकेर बसेका छन् ।

यो पनि पढ्नुहोस् :

किन परेनन् दुगड पक्राउ ? प्रहरीको सूचीमा अझै फरार !