मंसिर २१ गते हुने प्रतिनिधी तथा प्रदेश सभा निर्बाचनमा चितवनमा लोकतान्त्रिक समूह र वाम बिच कडा टक्कर हुने देखिएको छ । यसका लागि नेपाली कांग्रेस, चितवनले सबै उम्मेदवारहरुको अन्तिम टुंगो लगाइसकेको छ ।

चितवन निर्वाचन क्षेत्र नं. १ मा एमाले नेता सुरेन्द्र पाण्डेसँग कांग्रेसले राजेन्द्र वुर्लाकोटीलाई उम्मेदवार बनाएको कांग्रेस जिल्ला सभापति जीतनारायण श्रेष्ठले बताए । कांगे्रसले चितवन क्षेत्र नं. १ को प्रदेश क्षेत्र (क) मा धनबहादुर गुरुङ र (ख) मा उत्तम आर्चायलाई उम्मेदवार बनाएको सभापति श्रेष्ठले बताए ।

यस्तै, क्षेत्र नं. २ बाट शिक्षाराज्यमन्त्री शेषनाथ अधिकारीले कांग्रेसबाट टिकट पाए भने वामगठवन्धनबाट एमाले चितवनका अध्यक्ष कृष्णभक्त पोखरेल उम्मेदवार बनेका छन् । यो क्षेत्रमा कांग्रेसले प्रदेश क्षेत्र (क) मा जिल्ला सभापति जीतनारायण श्रेष्ठलाई र (ख) मा प्रकाश अधिकारीलाई पठाएको छ ।

उता चर्चित क्षेत्र नं. ३ मा माओवादी केन्द्रका अध्यक्ष पुष्पकमल दाहालसँग राप्रपा (प्रजातान्त्रिक) का उपाध्यक्ष विक्रम पाण्डे बिच कडा टक्कर हुने भएको छ । पाण्डेलाई उठाउने सहमति यसअघि नै कांग्रेसले गरिसकेकोले पाण्डेसँग चुवान लड्नु प्रचण्डलाई फलामका चिउर चपाउनु बराबर हुन्छ ।

यहाँ प्रदेश क्षेत्र (क) मा कांग्रेसले दिनेश कोइराला र (ख) मा साजनकुमार महतोलाई उम्मेदवार पठाएको छ ।

स्थानिय तहको निर्बाचनमा कांग्रेसले प्रचण्डपुत्री रेणु दाहाललाई सघाएको थियो । तर निर्बाचनको फाइदा उठाएर कांग्रेसको साथ छोडेका प्रचण्डलाई कांग्रेसको साथ र सहमतीमा उम्मेदवार बनेका बिक्रम पाण्डेले प्रचण्डलाई धुलो चटाउने भएका छन् ।