राष्ट्रपति विद्या भण्डारीले राजधानीमा हालै आयोजित एक कार्यक्रममा कवि तथा गीतकार एस.पी. कोइरालाको अंग्रेजी कविताहरुको संग्रह ‘सङ्स अफ स्वालोज’ को विमोचन गरिन् । सोही अवसरमा राष्ट्रपति भण्डारीले कवि कोइरालाको सोही काब्य कृतिमा आधारित रही चित्रकार अरुणा हिङ्माङद्वारा तयार पारिएको नौ दिने चित्रकला प्रदर्शनीको पनि उदघाट्न गरिन् ।

नेपाल आर्ट काउन्सिल, बबरमहलमा सिर्जनात्मक महिला समूह नेपालको आयोजनामा विमोचित कवि कोइरालाको चौथो कृति ‘सङ्स अफ स्वालोज’ उनको कविता संग्रह ‘गौँथलीहरूको गीत’को अनुवाद हो ।

कार्यक्रममा अतिथि राष्ट्रकवि माधव घिमिरेले कवि तथा गीतकार कोइरालाले आफ्ना कवितामा नवीन शैली प्रस्तुत गरेको उल्लेख गर्दै पुस्तकमा सामाजिक चिन्तन र सिर्जनाका गीत सम्प्रेषित भएको बताए । कार्यक्रमका अर्का अतिथि वाङ्मय शताब्दी पुरुष सत्यमोहन जोशीले यस अंग्रेजी कविता संग्रहले नेपाली साहित्यलाई अन्तर्राष्ट्रिय स्तरमा पहिचान दिलाउन मार्गदर्शकको भूमिका निर्वाह गर्ने उल्लेख गरे ।

कार्यक्रममा नेपाल ललितकला प्रज्ञा प्रतिष्ठानका पूर्व कुलपति किरण मानन्धर तथा पुस्तकका स्रष्टा एस.पी. कोइरालाले पनि बोलेका थिए । लामो समय प्रशासनिक सेवामा बिताएका कवि एस. पी. कोइराला (शंकर प्रसाद कोइराला) पूर्वमन्त्री पनि हुन् ।

कार्यक्रमममा चित्रकार अरुणा हिङमाङले राष्ट्रपतिलाई आफ्नो विशेष चित्रकला कृति समर्पण गरिन् । चित्रकार हिङमाङको यो चौथो एकल चित्रकला प्रदर्शनी हो ।