नयाँ शक्ति पार्टीका पर्सा संयोजक बलिराम साहले पार्टीप्रति गम्भीर कुठाराघात गरेको सो पार्टीले खुलासा गरेको छ । बाढीपीडितका लागि पार्टीका तर्फबाट दिइएको पचास हजार रुपैयाँ पीडितलाई नबाँडि पार्टी नै छोडेर एमाले प्रवेश गरेको अभियोग बाबुराम भट्टराईको नयाँ शक्तिले बलिराममाथि लगाएको छ ।

यसबारे जानकारी दिन आज वीरगञ्जमा आयोजित पत्रकार सम्मेलनमा सो पार्टीका केन्द्रिय नेता करिश्मा मानन्धरसमेत उपस्थित थिइन् । मानन्धरको उपस्थितिमा नयाँ शक्तिका जिल्ला नेताहरूले पूर्व जिल्ला संयोजक साहको धज्जी उडाएका थिए । षडयन्त्रकारी सोच भएका साहलाई पार्टीले पटक–पटक मौका दिए पनि त्यसको महत्व उनले बुझ्न नसकी पार्टीलाई घात गरेको आरोप नयाँ शक्तिका नेताहरूले लगाएका थिए ।

पार्टीबाट समानुपातिक सूचीमा परेकी करिश्मा मानन्धरचाहिँ भोट माग्न पर्सा आएकी बुझिएको छ । उनले ‘सबैको लागि समृद्धि सबैलाई सम्मान राज्यसत्ताका तहमा सबैको पहुँच समान’ भन्ने नारा सार्थक पार्नका लागि समानुपातिक भोट आँखा चिन्हमा प्रदान गर्न पर्सावासीसँग आग्रह गरिन् । राम रिझन यादवद्वारा संयोजन गरिएको सो कार्यक्रमबीच महिला नेतृ मोनिका सिंहको संयोकत्वमा प्रचारप्रसार समिति गठन गरिएको जानकारी दिइएको थियो ।

– प्रणय साह