छोरा नजन्माएको भन्दै परिवारजनले पीडा दिएको खप्न नसकी एक महिलाले आफ्नै नाबालिक छोरीको हत्या गरेको दर्दनाक घटना सार्वजनिक भएको छ । घटना बारा जिल्ला सुवर्ण गाउँपालिका–५ को हो ।

लगातार दुई छोरीको जन्म भएपछि २५ वर्षीया नजमा खातुनलाई सासु–ससुरा र रोजगारीका लागि विदेशमा रहेका श्रीमानले समेत अनेक किसिमले प्रताडना दिएको र यातना खप्नै नसक्ने भएपछि आफ्नी दुई वर्षीया छोरीको हत्या गर्ने सोच आएको खातुनको भनाई छ ।

छोरीको हत्या गरेको अभियोगमा हिजो आइतबार पक्राउ परेकी खातुनलाई बारा प्रहरीले आज सार्वजनिक गरेको हो । जिल्ला प्रहरी कार्यालय कलैया परिसरमा पत्रकार सम्मेलन गरी प्रहरीले नजमाले गत सोमबार साँझ छोरी बबिया खातुनको हत्या गरेको जानकारी दियो । दुईवटी छोरी मात्रै जन्माएको भन्दै विदेशदेखि श्रीमानले मानसिक तनाव दिएका र घरका अन्य सदस्यहरूले पनि दैनिक रुपमा यातना दिने गरेकोले आफूले यस्तो कदम उठाएको नजमाले प्रहरीलाई बयान दिएकी छिन् । छोरीको हत्या गरिदिएपछि दिनहुँको यातनामा कमी आउने आश आफूले गरेको उनको तर्क रहेको बताइएको छ ।

दुर्भाग्य त के छ भने मानसिक शान्तिको लागि काखे छोरीको हत्या गरेकी खातुनले अब लामो समय जेलमा गुजार्नुपर्ने सम्भावना प्रवल बनेको छ । उनीमाथि मुलुकी ऐन ज्यानसम्बन्धी मुद्दामा कार्वाही अगाडी बढाइएको र आरोप प्रमाणित भए २० बर्ष बढी जेल सजाय हुने बाराका प्रहरी प्रमुख राजकुमार बैदवारले जनाएका छन् ।

यसैबीच प्रहरीले ठूलो मात्रामा अवैध रुपमा उत्पादित घरेलु मदिरा नष्ट गरेको छ । वडा प्रहरी कार्यालय श्रीपुर (पर्सा)का प्रमुख प्रहरी निरीक्षक कुमार मैनालीको नेतृत्वमा खटिएको टोलीले घरेलु मदिरा उत्पादन गर्ने भट्टिसमेत नष्ट गरेकोे हो । पर्साको उदयपुरघुमी गाउँमा तयारी अवस्थामा रहेको पाँच सय लिटर घरेलु मदिरा र मदिरा बनाउनमा प्रयोग हुने कच्चा पदार्थ नष्ट गरिएको हो ।

– प्रणय साह