गत साता बुधबार चितवनको इच्छाकामना गाउँपालिका–३ फिस्लिङस्थित पृथ्वी राजमार्गबाट त्रिशूली नदीमा खसेको बसमा सवार सातजनाको अझै पत्ता लाग्न नसकेको जिल्ला प्रहरी कार्यालय चितवनले जनाएको छ ।
उक्त दिन काठमाडौंबाट अर्घाखाँचीतर्फ गइरहेको लु २ ख २९१ नम्बरको उक्त बस काठमाडौँतर्फ आइरहेको ना ६ ख ४९७२ नम्बरको ट्रकमा ठोक्किएर अनियन्त्रित भई सडकबाट त्रिशूली नदीमा खसेको थियो ।
हालसम्म बेपत्ता रहेकाहरूमा अर्घाखाँचीको सन्धिखर्क नगरपालिका–९ का दुर्गाबहादुर कार्की, सन्धिखर्क–१ का मनिषा थापा, धारापानी–३ का नमराज बन्जाडे, अर्घाखाँची भूमिकास्थाना नगरपालिकाका हुमकला राहु मगर, नवलपरासीका शंकर कुँवर, विकास रेग्मी र कोपिला पोखरेल छन् ।
घटनामा सातजनाको मृत्यु भएको थियो भने २२ जना घाइते भएका थिए । खसेको तीन दिनपछि नदीबाट बसलाई बाहिर निकालिएको थियो । घाइतेहरूको अहिले पनि काठमाडौँ र भरतपुरका अस्पतालमा उपचार भइरहेको छ ।
प्रतिक्रिया