राजधानीको दरबारमार्गमा स्थित आई क्लवमा पेस्तोल देखाएर आतङ्क मच्चाउने नेपाल प्रहरीका नायब निरीक्षक राजकुमार श्रेष्ठलाई प्रहरीले नियन्त्रणमा लिएको छ ।
मादक पदार्थ सेवन गरी दरबारमार्गस्थित आई क्लवमा पेस्तोल देखाएर आतङ्क मच्चाएको आरोपमा सई श्रेष्ठलाई प्रहरीले नियन्त्रणमा लिएको हो ।
बुधबार बिहान २ बजेतिर सादा पोशाकमा हतियारसहित छिरेका जनसेवा वृतको सिआरभीमा कार्यरत श्रेष्ठले क्लब सञ्चालकसँग विवाद गरेको आरोप छ । पेस्तोलसहित अन्य २ जना साथी लिएर सई श्रेष्ठ क्लव पुगेका थिए । उनले सञ्चालक र ग्राहकहरूसँग अभद्र ब्यवहार गरेको प्रहरीले जनाएको छ ।
विवाद गर्दै गरेका सई श्रेष्ठलाई तत्काल पुगेको दरबारमार्ग प्रहरीले नियन्त्रणमा लिएको थियो । श्रेष्ठ बिहान ६ बजेसम्म पनि झुम्म परेको अवस्थामा दरबारमार्ग प्रहरीमा भेटिएका थिए । सई श्रेष्ठलाई विभागीय कारबाही हुने प्रहरीले जनाएको छ ।
केही दिन अगाडि दरबारमार्गको एक होटेलमा युवतीलाई तीनजना युवकले सामूहिक बलात्कार गरेका थिए । सोही काण्डमा फसेका प्रहरी निरीक्षक लक्ष्मणसिंह ठकुरी निलम्बनमा परेका थिए ।
सो घटना सेलाउन नपाउँदै प्रहरीका अर्का सई पक्राउ परेका हुन् । यसरी प्रहरीका जवान नै एक पछि अर्को घटनामा मुछिदा प्रहरीप्रति गरिने विश्वासमाथिनै प्रश्न उठ्न थालेको छ ।
प्रतिक्रिया