नेपाल कम्युनिष्ट पार्टीका महासचिव विप्लवले आफ्नो पार्टीले मङ्गलबारका लागि आह्वान गरेको नेपाल बन्द ‘शानदार’ ढङ्गले सफल भएको दाबी गरेका छन् । मङ्गलबार साँझ एक ‘धन्यवाद विज्ञप्ति’ प्रकाशित गर्दै उनले बन्द सफल पार्न साथ–सहयोग गर्ने राजनीतिक दल र आमजनताप्रति आभार प्रकट गरेका छन् ।

धन्यवाद वक्तव्यमा उनले राज्य आतङ्क र ओली सरकारको दमनविरुद्ध नेपाल बन्द आयोजना गर्नुपरेको उल्लेख गर्दै आमजनता, मित्र राजनीतिक दलहरू र नेता–कार्यकर्ताको सक्रियतामा बन्द शानदार सफल भएको दाबी गरेका छन् । साथै, ‘बन्द–सङ्घर्ष’मा सहभागी सयौँ नेता–कार्यकर्तालाई सरकारले गिरफ्तार गरेको भन्दै विप्लवले यसअघि पक्राउ परेका सुदर्शन, पदमलगायत बन्दका क्रममा गिरफ्तार भएका सबैलाई यथाशीघ्र मुक्त गर्न माग गरेका छन् । यस मागको सुनुवाई नभए विरोधका सशक्त कार्यक्रम ल्याइने चेतावनी पनि उनले दिएका छन् ।

सोही विज्ञप्तिमार्फत् विप्लवले भोली ९ गते बुधबार कोणसभा, १० गते अन्तरक्रिया, ११ गते प्रधानमन्त्री ओलीको पुत्ला दहन, १२ गते प्रदर्शन र १३ गते देशब्यापी ठूलो कार्यक्रम आयोजना गरिने जानकारी पनि दिएका छन् ।