चन्द्रकान्त खनाल
रुपन्देहीको दुर्गम मर्चवारमा भएको दुईदिने निःशुल्क स्वास्थ्य शिविरमा दुई हजार ११ जना बिरामीको स्वास्थ्य परीक्षण भएको छ । तीमध्ये ११ सय १४ जना महिला र आठ सय ९७ पुरुष रहेको बताइएको छ । एक दिने भए पनि बिरामीको चाप बढी भएको कारण दुई दिन थप गराई उपचार गरिएको स्वास्थ्य महाशाखा प्रमुख डा. उमाशङ्करप्रसाद चौधरीले बताए ।
डा. चौधरीका अनुसार अधिकांशमा छाला र पेटसम्बन्धी रोग भएको पाइयो । गणतन्त्र दिवसको अवसर पारेर आयोजना गरिएको शिविरमा विशेषज्ञसहित स्वास्थ्य टोलीले सेवा दिएको थियो ।
प्रदेशस्तरीय शिशिरमा नाक, कान, छाला, पेट, मुटु, किड्नी, आँखा, दाँत, रेडियोलोजिस्टलगायतका टोली संग्लन थिए । भैरहवा सदरमुकामबाट ४० किटोमिटर टाढा रहेको उक्त क्षेत्र भारतको सिमानासँग जोडिएको छ । शिविरमा सहभागी अधिकांशले यस्ता शिविर लिएर फेरि पनि आउन आग्रह गरेको स्वास्थ्य महाशाखा प्रमुख चौधरीले बताए ।
शिविरमा लुम्बिनी अञ्चल अस्पतालका मेसु डा. कृष्ण खनालको नेतृत्वमा गएको स्वास्थ्य टोलीले मर्चवारमा उपचार हुन नसकेकाहरूलाई लुम्बिनी अञ्चल अस्पतलमा उपचारका लागि बोलाएको बताए ।
प्रदेश ५ का सामाजिक विकासमन्त्री सुदर्शन बरालले प्रदेशका सबै क्षेत्रमा सहज रूपमा सेवा पाउने व्यवस्था गर्ने बताएका छन् । ‘हामीले यो शुरुवात मात्र गरेका हौँ, अब यसलाई निरन्तरता दिइनेछ,’ उनले भने । दुई दिनसम्म चलेको उक्त स्वास्थ्य शिविर निःशुल्क भएको मन्त्री बरालको भनाइ थियो ।
प्रतिक्रिया