वर्षौंदेखि टनका टन राजश्व छलेर सुन तस्करी गर्नेहरु अभियोग किटानी भई पक्राउ परे पनि धमाधम नाम मात्रको कारवाहीमा पर्ने र छुट्ने क्रम चलिरहँदा एक भरिया युवकलाई भने भारी जरिवानासहितको जेल सजाय सुनाइएको छ । अन्नपूर्ण पदमार्गअन्तर्गत लमजुङको खुदीमा १७ किलो सुनसहित पक्राउ परेका एक युवकलाई आठ करोड जरिवानासहित १० वर्ष ६ महिना जेल सजायको फैसला भएको छ ।

ज्याला मजदूरी गर्दै आएका मनाङको नासोङ गाउँपालिका–९, दानाक्युका ३१ वर्षीय पासाङ गुरुङलाई उक्त सजाय फैसाला भएको हो । जिल्ला अदालत लमजुङका न्यायाधीश कोमलप्रसाद आचार्यको इजलासले संगठित अपराध निवारण ऐन, २०७० अन्तर्गत सो कैद सजायको फैसला गरेको अदालतले जनाएको छ ।

बिगोबमोजिम उनलाई रु आठ करोड १६ लाख १४ हजार ९६० जरिवाना तोकिएकोे अदालतका स्रेस्तेदार भूमिप्रसाद शर्मालाई उद्धृत गर्दै राससले समाचार सम्प्रेषण गरेको छ ।

मनाङबाट बेँसीशहरतर्फ मोटरसाइकलमा आएका गुरुङ पाँच महिनाअघि १७ किलो सुनसहित मर्स्याङ्दी–२, खुदीमा पक्राउ परेका थिए । भरियाका रुपमा सुन बोकेका गुरुङ पक्राउ परे पनि यसको तस्कर समूह अझै पक्राउ पर्न सकेका छैन ।