दक्षिण कोरियामा १२ देखि १७ जुलाईसम्म सञ्चालन हुने ‘१२औँ वल्र्ड तेक्वान्दो कल्चर एक्स्पो २०१८’ मा राष्ट्रिय तेक्वान्दो सङ्घ नेपालका खेलाडीले सहभागिता जनाउने भएका छन् । उक्त एक्स्पोमा राष्ट्रिय तेक्वान्दोका ९ खेलाडीले सहभागिता जनाउने संघका महासचिव राजकुमार कार्कीले जनाएका छन् ।

उक्त एक्स्पोमा सहभागिता जनाउने खेलाडीलाई गृहमन्त्री रामबहादुर थापा (बादल)ले बिदाइ गरेका छन् । बिदाइ कार्यक्रममा संघका वरिष्ठ उपाध्यक्ष एकनाथ थापालगायत संघका पदाधिकारी र खेलाडीहरूको उपस्थिति रहेको थियो । सो अवसरमा गृहमन्त्री बादलले खेलाडीलाई उच्च मनोबलका साथ राष्ट्रका लागि खेल्न शुभकामना दिएका थिए ।

साथै गृहमन्त्री थापाले मार्सल आर्टस् खेलमा नेपालले राम्रो गर्न सक्ने सम्भावना भएकाले समयअनुरूप परिवर्तन गर्दै तेक्वान्दोमा देखिएको सिन्डिकेट अन्त्य गर्न आवश्यक भूमिका निर्वाह गर्नेसमेत प्रतिबद्धता जाहेर गरेका थिए ।

सो एक्स्पोमा क्योगुरी ३२ केजी पुरुषतर्फ जितबहादुर कामी, ४८ केजीमा विशाल पौडेल उपाध्यय, ५४ केजीतर्फ विनोद श्रेष्ठ, ६५ केजीमा राधाबहादुर तामाङ र पुम्सेतर्फ हरि थापा रहेका छन् । त्यस्तै प्रमुख प्रशिक्षकमा रमेश तामाङ, टिम म्यानेजर धर्मेन्द्र बानियाँ अग्रहरि र कोचमा मनीष बसेल रहेका छन् ।

त्यस्तै सोही टिम कोरियाको जेजु टापुमा १८ देखि २४ जुलाईसम्म सञ्चालन हुने जेजु कोरिया ओपन अन्तर्राष्ट्रिय तेक्वान्दो च्याम्पियनसिपमा २०१८ मा पनि सहभागी हुने महासचिव कार्कीले जनाएका छन् । उक्त टोलीको नेतृत्व वरिष्ठ उपाध्यक्ष एकनाथ थापाले गर्नेछन् ।