राजविराज नगरपालिकाको सहयोग तथा सप्तरी क्रिकेट संघको आयोजनामा राजविराजमा संचालित मेयर कप सप्तरी प्रिमियर लिग अन्तर्गत लिग चरणको अन्तिम खेलमा बजाज खडक वारियर्सले तिलाठी कोइलाडी महिन्द्रा हिरोजलाई पराजित गरेको छ ।

तीन टाली सहभागी लिगको समाप्तिपछि सबै ४ खेलमा शतप्रतिशत जितको साथ समुह बिजेताको रुपमा बजाज खडक वारियर्स तथा ४ मध्ये २ खेलमा जित र २ खेलमा हारको साथ उपविजेताको रुपमा बोदे बर्साइन थन्डर्स फाइनल प्रवेश गरेको छ ।

अन्तर्राष्ट्रिय खेलाडी मेहबुब आलम कप्तानीको तिलाठी कोइलाडीले भने चारवटै खेलमा पराजय ब्योहोरेको छ । प्रतियोगिताको फाइनल खेल भोली बुधबार ११ बजे बजाज खडक वारियर्स र बोदे बर्साइन थन्डर्सबीच खेलिनेछ ।

पब्लिक विन्देश्वरी स्कुल मैदानमा सम्पन्न खेलमा टस जितेर ब्याटिंग गरेको तिलाठी कोइलाडीले २० ओभरमा ९ विकेट गुमाएर ११२ रनको योगफल तयार गरेको थियो । उसको लागि ओपनर राहुल मण्डलले सर्वाधिक ३० रन, समसाद शेखले २२ रन तथा विकाश दासले १६ रन बनाए । बलिङ्गतर्फ बजाज खडक वारियर्स बलर गोमनन्द अमथ, उपेन्द्र रोय, विवेक यादब र पुष्प थापाले २ र २ विकेट हात पारे ।

११३ रनको लक्ष्य वारियर्सले १६.५ ओभरमा पछ्यायो । ओपनर हरिशंकर शाहले अविजित ४७ रन तथा कप्तान विवेक यादवले अविजित ४२ रन बनाएपछि जित सहज बन्यो । शाहले ५३ बलमा ४ चौका र १ छक्का तथा यादब २२ बलमा २ चौका र ५ छक्का प्रहार गरे । हसिम अन्सारीले १६ रनको योगदान दिए ।

कप्तान विवेक यादव खेलको म्यान अफ द म्याच घोषित भए । उद्योग बाणिज्य संघ सप्तरीका अध्यक्ष अरुण प्रधानले पुरस्मार वितरण गरे ।