इन्डोनेसियामा हुने १८औँ एसियाली खेलकुदमा सहभागी हुने नेपाली भारोत्तोलन टोली वैदेशिक प्रशिक्षणका लागि साउन १७ गते बुधबार थाइल्यान्ड प्रस्थान गरेको छ ।

एसियाडअन्तर्गत भारोत्तोलनतर्फ पुरुषमा ८ र महिलामा ७ गरी १५ स्पर्धामा प्रतिस्पर्धा हुनेछ । नेपालले भने पुरुष÷महिलमा समान २–२ गरी ४ स्पर्धामा सहभागिता जनाउनेछ । पुरुषमा कमलबहादुर अधिकारीले ६९ केजी तथा विकास थापाले ७७ केजी तौलसमूहमा प्रतिस्पर्धा गर्नेछन् । कमल १०औँ सागका स्वर्णधारी तथा विकास १२औँ सागका रजत विजेता हुन् ।

त्यस्तै, महिलाको ५३ केजीमा सन्जु चौधरी तथा ७५ केजीमा १२औँ सागकी कांस्य विजेता तारादेवी पुनले सहभागिता जनाउनेछन् । चारै खेलाडी आ–आफ्नो स्पर्धाका राष्ट्रिय कीर्तिमानधारी हुन् । प्रशिक्षकमा दिनेश भुजेल रहेका छन् ।

टोली थाइल्यान्डमा चोनबुरी स्पोर्टस् स्कुलमा अगस्ट १७ तारिखसम्म प्रशिक्षणरत रहनेछ । अगस्ट १८ मा टोली इन्डोनेसिया जाने कार्यक्रम छ । एसियाडअन्तर्गत भारोत्तोलन अगस्ट २० देखि १७ तारिखसम्म चल्नेछ । भारोत्तोलनको ७३ दिनको विशेष बन्द प्रशिक्षण नेपालगन्जमा भएको थियो ।

१९८२ मा भारतमा भएको एसियाली खेलकुदमा नेपालले पहिलोपटक भारोत्तोलनमा सहभागिता जनाएको थियो । त्यसयता एकपटक १९९४ मा जापानको हिरोसिमामा भएको एसियाडमा मात्र नेपालले भारोत्तोलनमा सहभागिता जनाएको छैन । टोलीलाई राष्ट्रिय खेलकुद परिषद्का सदस्यसचिव केशवकुमार विष्टले त्रिपुरेश्वरमा आयोजित एक कार्यक्रमबीच बुधबारै बिदाइ गरे ।