बैतडीमा गएको चार वर्षमा ११५ जनाले आत्महत्या गरेका छन् ।
जिल्ला प्रहरी कार्यालय, बैतडीका अनुसार यस जिल्लामा आत्महत्या गर्नेको संख्या हरेक वर्ष क्रमिक रूपले बढ्दै गएको छ । आर्थिक वर्ष ०७१–७२ मा १६ जनाले आत्महत्या गरेकामा आव ०७२–७३ मा यो संख्या बढेर २९ जना पुग्यो । आव ०७३–७४ मा यो संख्या अझै बढेर ३६ पुग्यो । गत आवमा ३१ जनाले आत्महत्या गरेको तथ्यांक छ ।

जिप्रकाका प्रहरी प्रवक्ता कान्तिराज जोशीका अनुसार चालू आवको आजसम्म तीनजनाले आत्महत्या गरेका छन् । बैतडीमा आत्महत्या गर्नेको संख्या डरलाग्दो देखिएकाले सचेतना कार्यक्रम सञ्चालन गर्नुपर्ने खाँचो रहेको विज्ञहरू बताउँछन् ।
बैतडीका प्रमुख जिल्ला अधिकारी चन्द्रप्रसाद गैरे आत्महत्या मानसिक असन्तुलनको उपज भएकाले यसको रोकथामका लागि परिवारको सहयोग जरुरी हुने बताउँछन् । उनी भन्छन्, ‘घरेलु हिंसा न्यून गर्न सकिए आत्महत्याको दर पनि घट्छ । यसको रोकथाम गर्नु समग्र समाजको दायित्व भएकाले सबैले आ–आफ्नो क्षेत्रबाट भूमिका निर्वाह गर्नुुपर्छ ।’

आत्महत्याका घटना बढ्दै जानुका मुख्य कारण तनाव भएको मनोविज्ञान सम्प्रदाय नेपाल (टिपस)का डा नरेन्द्र ठगुन्ना बताउँछन् । उनी आत्महत्याको घटनामा कमी ल्याउन विद्यालयस्तरदेखि नै मनोशिक्षाको अध्यापन गराउनुपर्ने विचार राख्छन् । टिपसका अनुसार देशभर आव ०७४–७५ मा ५ हजार ३४६ जनाले आत्महत्या गरेका थिए ।