पुनहरि बेल्बासे, भैरहवा
महामानव गौतमबुद्ध जन्मस्थल लुम्बिनीमा पहिलोपटक बौद्ध ग्रन्थ त्रिपिटक वाचन भएको छ । त्रिपिटक बुद्धले दिएको ज्ञान र शिक्षाको सार संग्रहित महत्वपूर्ण ग्रन्थ मानिन्छ । अमेरिकन बुद्धिष्ट एशोसिएसन, अखिल नेपाल भिक्षु महासंघ र थाई बुद्ध बिहार लुम्बिनीको संयुक्त आयोजनामा त्रिपिटक वाचन भएको हो ।
आज (बुधबार) बिहान ७ बजेदेखि शान्ति ऱ्याली गरी मायादेवी मन्दिरको पवित्र उद्यानभित्र त्रिपिटक वाचन भएको हो । त्रिपिटक वाचनका लागि १८ देशबाट ७ सय भन्दा बढी बौद्ध भिक्षु, भिक्षुणी, उपासक, उपासिका लुम्बिनी आएको अखिल नेपाल भिक्षु महासंघका अध्यक्ष एवम आयोजक भिक्षु मैत्रेयले बताए ।
यसपटक लुम्बिनीमा तीनवटै पिटकसँगै गौतमबुद्धले आफ्ना पिता राजा शुद्धोधनलाई धर्मदेशना (ज्ञान दिँदा) गर्दा सुनाएका वसन्त जातक सुत्र र शाक्य र कोलिय राज्यहरुका बीच युद्ध हुन लाग्दा कपिलवस्तुमै युद्ध समाप्तीका लागी देशना गरेका महासमय सुत्र पनि पाठ गरिने हुनाले यो समारोह लुम्बिनीको आध्यत्मिक दर्शनका लागि अत्यन्त महत्वपूर्ण रहने आयोजक समितिका सचिव चेतन पन्तले बताए । लुम्बिनीको आध्यात्मिक विकास र पर्यटकको बसाई अवधि लम्बाउन त्रिपिटक वाचन समारोह महत्वपूर्ण हुने सचिव पन्तको दाबी छ ।
अपि धम्मपिटक, सुत्तपिटक, विनयपिटक लाई जोडेर त्रिपिटक नामाकरण गरिएको हो । अपि धम्मपिटक, सुत्तपिटक भगवान बुद्धकै पालामा लेखिएको र विनयपिटक दोश्रो शताब्दी ईशापूर्व सम्राट अशोकको पालामा लेखिएको बौद्ध ग्रन्थ हो ।
त्रिपिटक पाली, देवनागरी र थाई लगायतका भाषामा वाचन गरिएको छ । जसलाई सहभागी प्रत्येक देशका भिक्षुहरुले आआफ्नो भाषा र शैलीमा पनि वाचन गरे ।
विगत १५ वर्षदेखि भारतमा मात्र भैरहेको यो आध्यत्मिक कार्यक्रमले लुम्बिनीको आध्यात्मिक, सांस्कृतिक महत्व अझ बढाउने र बौद्धमार्गी पर्यटक आगमनमा थप टेवा पुग्ने विश्वास गरिएको छ ।
प्रतिक्रिया