डोटीको आदर्श गाउँपालिका–७ तलारा गाउँकी ४० वर्षीया भागिरथी जोशी भालुको आक्रमणबाट गम्भीर घाइते भएकी छिन् । घरनजिकै घाँस काटेर फर्किरहेको अवस्थामा भालुले झम्टिएपछि घाइते भएको जोशीले बताइन् । उनको शरीरभरि घाउ छ ।

यसैगरी बझाङको गुदुखाती गाउँमा भालुको आक्रमणबाट स्थानीय ६० वर्षीया जरु धामी घाइते भएकी छिन् । उनी घरनजिकै घाँस काट्ने क्रममा भालुको आक्रमणमा परेकी थिइन् । आक्रमणबाट उनले एउटा आँखा गुमाउनुपरेको छ ।

गुदुखातीमा भालुको आक्रमणबाट थप तीन स्थानीय घाइते भएको उनले बताइन् । घाइतेलाई उपचारका लागि सेती अञ्चल अस्पताल धनगढी ल्याइएको छ ।

यसैगरी पर्वतको जलजला गाउँपालिका–७ धाइरिङस्थित घाहाखेतमा बाँदरको आक्रमणबाट एक महिला गम्भीर घाइते भएकी छिन् ।

स्थानीय ४० वर्षीया लक्ष्मी जैसी मंगलबार बाँदरको आक्रमणबाट घाइते भएकी हुन् । घरभित्र अन्नपात खानका लागि पसेका बाँदर लखेट्ने क्रममा जैसीलाई बाँदरले आक्रमण गरेको हो । जैसीको मणिपाल शिक्षण अस्पताल, पोखरामा उपचार भइरहेको स्थानीय झलक आचार्यले जानकारी दिए । बाँदरले दुःख दिन थालेपछि स्थानीयले बाँदर नियन्त्रणका लागि प्रशासन र स्थानीय गाउँपालिकालाई गुहार्दै आएका छन् ।