बबई नदीमा निर्माण गरेको पुल केही महिनामै भत्किएपछि चर्चामा आएका पप्पु कन्स्ट्रक्सनका मालिक हरिनारायणप्रसाद रौनियार भ्रष्टाचार मुद्दामा धरौटीमा रिहा भएका छन् । निलम्बित सांसद रहेका रौनियार १ करोड ७५ लाख रुपैयाँ धरौटीमा छुटेका हुन् ।

गत १९ असोजमा अख्तियार दुरुपयोग अनुसन्धान आयोगले रौनियार र उनका छोरा सुमित रौनियारविरुद्ध जनही १९ करोड ३२ लाख २५ हजार ६९५ रुपैयाँ बिगोदाबीसहित मुद्दा दायर गरेको थियो । तर, विशेष अदालतले १ करोड ७५ लाख मात्र धरौटी मागेपछि सो बुझाएर उनी रिहा भएका हुन् ।

हिजो आइतबार छोरा सुमितसहित रौनियार विशेष अदालतमा उपस्थित भएका थिए । हाल पप्पु कन्स्ट्रक्सनको स्वामित्व छोरा सुमितको नाममा रहेको र सुमितलाई पनि एक करोड ७५ लाख नै धरौटी माग गरिएको विशेष अदालतले जनाएको छ ।