भारतको राजस्थानस्थित बार्मर क्षेत्रमा आज (आइतबार) अपरान्ह एक धार्मिक कार्यक्रम आयोजन भइरहँदा एक्कासी हावासहित परेको वर्षाका कारण ‘पन्डाल’ भत्किँदा कम्तीमा १४ जनाको मृत्यु भएको छ । घटनामा परेर २५ जना घाइते भएका एएनआईले जनाएको छ ।

धार्मिक सभाका लागि निर्माण गरिएको उक्त अस्थायी संरचना (टेन्ट) भत्किएर निम्तिएको दुर्घटनामा गम्भीर घाइते भएकाहरूलाई उपचारका लागि विभिन्न अस्पतालमा भर्ना गरिएको छ ।

स्थानीय एक स्कुलको मैदानमा पण्डाल टाँगेर राम पूजा लगाइँदै गर्दा अचानक हावाहुरी चलेपछि कथा सुन्न भेला भएका भक्तालुजनमा हाहाकार मच्चिएको थियो ।

भारतीय प्रधानमन्त्री नरेन्द्र मोदीले धार्मिक सभामा भएको उक्त घटनाप्रति दुःख व्यक्त गर्दै मृतकका परिवारप्रति समवेदना व्यक्त गरेका छन् । उनले घाइतेहरूको शीघ्र स्वास्थ्य लाभका लागि कामना पनि गरेका छन् ।

प्रधानमन्त्रीको कार्यालयको आधिकारिक ट्वीटर पेजमा प्रधानमन्त्री मोदीले भनेका छन्, ुबार्मरमा पान्डाल भत्केर दुःखद् घटना घटेको छ । यस समय घटनामा ज्यान गुमाउने शोकाकुल परिवारप्रति म समवेदना प्रकट गर्न चाहन्छु साथै घटनामा घाइते भएका सबैको शीघ्र स्वास्थ्य लाभका लागि कामना गर्दछु ।”

यसैगरी राजस्थानका मुख्यमन्त्री अशोक गहलोतले घटनाले आफूलाई स्तव्ध बनाएको बताएका छन् ।