रुसको साइबेरियामा अवतरणका क्रममा अनियन्त्रित भएको एउटा सानो यात्रुबाहक विमान विमानस्थल नजिकैको भवनमा ठोक्किएर दुर्घटनाग्रस्त हुँदा चालक दलका दुई जनाको मृत्यु भएको छ ।

साइबेरियाको निझनियनगास्रक विमानस्थलमा आपतकालीन अवतरण गर्नेक्रममा आज (बिहीबार) बिमान दुर्घटनाग्रस्त भएको हो । एएन–२४ कलसाइन रहेको उक्त विमान उलान–उडबाट आएको र दुर्घटनामा परेपछि धावनमार्गबाट करिव सय मिटर टाढा उछिट्टिएको एएफपीले जनाएको छ। ।

आपतकालीन अवतरण गरेको विमानले धावनमार्ग नजिकैको फोहोर प्रशोधन केन्द्रको भवनमा ठक्कर दिएको थियो । बिमानका चालक दलका दुबै सदस्यको मृत्यु भए पनि बिमानमा सवार सबै ४३ जना यात्रु सकुशल रहेको स्थानीय प्रहरीले जनाएको छ ।

दुर्घटनाग्रस्त बिमानमा तत्कालै आगलागी भएको थियो । रुसी उड्डयन प्राधिकरणले दुर्घटनाको बारेमा अनुसन्धान शुरु गरेको जनाएको छ ।