सबभन्दा ठूलो हाइड्रो प्रोजेक्ट, सबभन्दा लामो पुललगायत विभिन्न भव्य निर्माणका लागि संसारभर चर्चामा रहेको चीनले फेरि यस्तै अर्को विशाल निर्माण कार्य सम्पन्न गरेर विश्वलाई नै चकित तुल्याएको छ ।

कम्युनिस्ट शासनको ७० वर्ष पूरा भएको अवसरमा चीनले एक चामत्कारिक विमानस्थल सञ्चालनमा ल्याएको छ । बेइजिङमा बुधबार उदघाटन गरिएको दाक्सिङ अन्तर्राष्ट्रिय विमानस्थल विश्वकै सबभन्दा ठूलो अन्तर्राष्ट्रिय विमानस्थल हुन पुगेको छ ।

जम्मा पाँच वर्ष अवधिमा निर्माण सम्पन्न भएको दाक्सिङ विमानस्थलको राष्ट्रपति सी जीनपिङले बुधबार (८ असोज) औपचारिक रूपमा उद्घाटन गर्दै सञ्चालन शुभारम्भ भएको घोषणा गरेका हुन् ।

उक्त विमानस्थल बेइजिङबाट ४६ किलोमिटरको दूरीमा दाक्सिङमा अवस्थित छ । करिव ७ लाख वर्ग मिटरमा बनेको उक्त विमानस्थल सय वटा फुटबल मैदानबराबर एरियामा फैलिएको छ । यो विमानस्थलको निर्माणमा चीनले ११ अर्ब अमेरिकी डलर खर्च गरेको छ ।

उदघाटनकै दिन घरेलु तथा अन्तर्राष्ट्रिय एयरलाइन्सका विमानहरूले सो विमानस्थलमा उडान शुरु गरेका छन् । आकृतिका दृष्टिले अन्तरिक्ष यान जस्तो देखिने उक्त विमानस्थलमा वर्षेनी १० करोड यात्रुले आवतजावत गर्ने अनुमान गरिएको छ । विमानस्थलमा घरेलु र अन्तर्राष्ट्रिय यात्रीको लागि भिन्नाभिन्दै टर्मिनल निर्माण गरिनुको साथै आकर्षक बँगैचालगायतको व्यवस्था गरिएको छ ।

यो विमानस्थलको टर्मिनलतल एउटा टे्रन स्टेशन र मेट्रो लाइन पनि छ, जसले यात्रीलाई केवल २० मिनेटमा मुख्य शहरको केन्द्रसम्म पुऱ्याउन सक्छ । यो विमानस्थलमा सन २०४० सम्ममा आठ रन वे सुरु गरिने योजना छ ।

दाक्सिङ अन्तर्राष्ट्रिय विमानस्थलको डिजाइन ब्रिटिस वास्तुकार जाहा हदीदले तयार पारेका हुन् । हदिदको सन २०१६ मा मृत्यु भैसकेको छ ।