नेपालमा एक जना कोरोना संक्रमित पत्ता लगाउन रु एक लाख चार हजार ६ सय ३० खर्च भइरहेको स्वास्थ्य मन्त्रालयले जनाएको छ ।

स्वास्थ्य तथा जनसङ्ख्या मन्त्रालयका प्रवक्ता डा. जागेश्वर गौतमले शुक्रबारको नियमित प्रेस ब्रिफिङका क्रममा यस्तो दाबी गरेका हुन् ।

प्रवक्ता गौतमकाअनुसार अहिलेसम्म ३० हजार ४ सय ८३ संक्रमित पत्ता लगाइएको र रु. पाँच हजार ५०० प्रतिपिसिआर परीक्षण खर्च भइरहेको छ ।

मन्त्रालयले अहिलेसम्म पाँच लाख ७९ हजार ८९९ जनाको पिसिआर परीक्षण गरिसकेको प्रवक्ता डा. गौतमको भनाइ छ । यसका लागि (पिसिआर परीक्षण) रु. तीन अर्ब १८ करोड ९४ लाख ४४ हजार ५०० खर्च भएको छ ।

उनले भने– ‘एउटा संक्रमण भेटाउनका लागि सरकारले अहिले एक जनामा एक लाख ४ हजार ६३० रुपियाँ खर्च भएको छ । उपचारमा खर्च एक व्यक्तिको ३० दिन राख्दा चार लाख ५० हजार रुपियाँ खर्च हुने गरेको छ, यसरी कोरोनाको जाँच गर्ने र पत्ता लगाउने र उपचार गर्ने पद्धति धेरै नै खर्चिलो भएको छ । त्यसैले जरुरी काम नपरीकन बाहिर ननिस्कनु होला ।’

प्रवक्ता गौतमले घरबाहिर निस्कनै पऱ्यो भने दुई मिटरको दूरी कायम गरी मास्क र सेनिटाइजर प्रयोग गर्न तथा घर गइसकेपछि साबुनपानीले मिचिमिची हात धुन अनुरोध गरे ।

नेपालमा अहिलेसम्म गरिएको परीक्षणमा पाँच लाख ४९ हजार ४१६ जनामा संक्रमण देखिएको छैन । यस्तै १८ हजार २१४ जना निको भई घर फर्किसकेका छन् भने १३७ जनाको संक्रमणको कारणले मृत्यु भएको छ । यसैगरी संक्रमित बढ्न थालेपछि सघन उपचार कक्ष भेन्टिलेटरमा उपचार गराउने संक्रमित बढेका छन् ।

डा. गौतमका अनुसार आइसियुमा १३३ र भेन्टिलेटरमा १५ जना छन् । यस्तै पाँच सयभन्दा बढी संक्रमित रहेका ६ जिल्ला मोरङ, पर्सा, महोत्तरी, रौतहट, सर्लाही र काठमाडौँ छन् । संक्रमित शून्य रहेका जिल्लामा भोजपुर, मुस्ताङ, म्याग्दी र हुम्ला छन् । संक्रमण रहेका टोलटोलमा अहिले पनि खुला हिँड्ने र नाचगान गरिएको पाइएकाले त्यसो नगर्न आग्रह गर्दै उनले धेरै जनामा संक्रमण फैलियो भने उपचारका लागि समस्या झनै थपिने प्रष्ट्याए ।