नेपालमा कोरोना संक्रमितको संख्या १,५३,००५ पुगेको छ। पछिल्लो २४ घण्टामा थप ४,४९९ जना कोरोना संक्रमित थपिएपछि संक्रमितको कुल संख्या डेढ लाख नाघेको हो ।

स्वास्थ्य तथा जनसंख्या मन्त्रालयले जनाएअनुसार पछिल्लो २४ घण्टामा काठमाडौं उपत्यकामा थप २,७२० कोरोना संक्रमित थपिएका छन् । काठमाडौंमा २,३५७ जना, भक्तपुरमा १२७ र ललितपुरमा २२६ नयाँ संक्रमित थपिएका हुन् । थपिने संक्रमितमा १,०९२ महिला र १,६२८ पुरुष रहेका मन्त्रालयको वेभसाइटमा उल्लेख छ ।

यस्तै, पछिल्लो २४ घन्टामा नेपालमा थप १७ जनाको कोरोना संक्रमणबाट मृत्यु भएको छ । शुक्रबार थपिएका सत्रसहित नेपालमा कोरोना संक्रमणबाट मृत्यु हुनेको संख्या ८२९ पुगेको छ ।

मन्त्रालयले हालसम्म निको भई डिस्चार्ज हुने व्यक्तिको संख्या १,०५,४८८ पुगेको जनाएको छ ।