विशेष प्रतिनिधि, दाङ

लुम्बिनी प्रदेश स्थायी राजधानी तोकिएसँगै हिउँदे अधिवेशनको तयारीका लागि प्रदेश सभामुख पूर्ण घर्ती, उपसभामुख कृष्णी थारू र आन्तरिक मामिला तथा कानून मन्त्री कुलप्रसाद केसीसहितको टोलीले देउखुरीका विभिन्न क्षेत्रको निरीक्षण गरेका छन् ।

स्थायी राजधानी देउखुरी तोकिएसँगै हिउँदे अधिवेशन देउखुरीमा गर्न थालिएको हो । लालमटियास्थित राप्ती प्राविधिक शिक्षालयलको परिसरमा संसद बैठक सञ्चालन गर्न सम्भव भए-नभएको बारेमा टोलीले अध्ययन एवं छलफल गरेको हो ।

तिहार पछि हुने हिउँदे अधिवेशन देउखुरीमा गर्ने तयारी गरिएको छ । १६ विघा क्षेत्रफलमा राप्ती प्राविधिक शिक्षालय भएकाले प्रदेशसभा सञ्चालन गर्न उपयुक्त रहेको कुरा उठेपछि निरीक्षण तथा छलफल गरिएको बताइएको छ ।