सत्तारुढ नेपाल कम्युनिष्ट पार्टी (नेकपा) भित्र चरम गुटबन्दी चलिरहेको बेला शहरी विकासमन्त्री कृष्णगोपाल श्रेष्ठले कुनै पनि हालतमा पार्टी नफुट्ने जिकिर गरेका छन् । यतिबेला केही समस्या देखापरेका भए पनि शीर्ष नेतृत्वले समाधान गर्ने विश्वासमा आफू रहेको उनको भनाइ छ ।

नेकपा बल्खु टेकुसी परिवारले दिपावलीलगायत अन्य पर्वका अवसरमा शनिबार आयोजना गरेको कार्यक्रममा मन्त्री श्रेष्ठले वामपन्थी आन्दोलनको लामो इतिहासका साथै ठूला दुई शक्तिशाली पार्टीको एकताबाट निर्माण भएको सो पार्टीमा अहिले देखापरेका केही समस्या शीर्ष नेतृत्वले समाधान गर्ने विश्वास व्यक्त गरे ।

सात दशकअघि मुलुकमा प्रजातन्त्र प्राप्त भएपछि गठन भएका कुनै पनि सरकारले पाँच वर्षको कार्यकाल पूरा गर्न नसकेका र त्यसबाट उत्पन्न भएको अस्थिरताले देशको विकास निर्माणमा अवरोध आएको भन्दै उनले राजनीतिक स्थायित्व कायम गरी मुलुकमा सुशासन र समृद्धि प्राप्त गर्ने आधारमा भएको एकता कसैले चाहँदैमा विभाजन नहुने ठोकुवा गरे ।

जनताको हितलाई केन्द्रमा राखेर पार्टी सङ्गठनका कार्यलाई समन्वयकारी भूमिका निर्वाह गर्ने प्रतिबद्धता पनि उनले व्यक्त गरे । हरिकान्त पाठकको अध्यक्षतामा भएको सो कार्यक्रममा मन्त्री श्रेष्ठको अभिनन्दनसमेत गरिएको थियो भने काठमाडौं महानगरपालिका-१४ का वडाध्यक्ष शोभा सापकोटाले विकास निर्माणका कार्यमा ठेकेदारबाट हुने ढिलासुस्ती तथा भ्रष्टाचारका कार्यलाई अन्त्य गर्नुपर्नेमा जोड दिए ।