थप सतर्कताको लागि नेपाल एयरलाइन्सलाई चेतावनी

विशेष प्रतिनिधि, टोकियो (जापान)

यही नोभेम्बर ६ तारिखको उडानमा जापान आएका ७ जना नेपालीमा कोरोना संक्रमण पुष्टि भएको छ । नेपालबाट संक्रमित नरहेको रिपोर्ट लिएर आएका उनीहरुमा जापानको विमानस्थलमा गरिएको परीक्षणमा कोभिड-१९ पोजेटिभ देखिएको हो ।

यसरी संक्रमित हुनेमा दुई महिला र पाँच जना पुरुष रहेका छन् । विगतमा जस्तै यस पटकका संक्रमितहरुमा पनि खासै कुनै लक्षण देखिएको थिएन ।

पछिल्लो पटक थपिएका सात जनासहित जापानको एयरपोर्टमा कोरोना संक्रमित पुष्टि हुने नेपालीको संख्या ४३ पुगेको छ । संक्रमितहरुमध्ये अधिकांश निको भएर डिस्चार्ज भइसकेका छन् ।

ज्ञातव्य छ, एयरपोर्टमा धेरै संक्रमित भेटिन थालेपछि केही दिनअघि नेपाल एयरलाइन्सलाई थप सतर्कताको लागि जापानको सम्बद्ध निकायबाट चेतावनी दिइएको थियो ।