नेपाल कम्युनिष्ट पार्टी (नेकपा) का अध्यक्ष एवम् प्रधानमन्त्री केपी शर्मा ओलीले आफ्नो बहुप्रतीक्षित धारणा लिखित रूपमा पार्टीको सचिवालय बैठकमा पेश गरेका छन् । यसअघि मङ्सिर ३ गते सहअध्यक्ष प्रचण्डले केपीमाथि विभिन्न संगीन आरोप लगाउँदै प्रस्ताव पेश गरेका थिए ।
शनिबारको पार्टी बैठबारे जानकारी दिँदै नेकपाका प्रवक्ता नारायणकाजी श्रेष्ठले प्रधानमन्त्री निवास बालुवाटारमा बसेको सचिवालय बैठकमा अध्यक्ष ओलीले यसअघिको बैठकमा तय भएअनुसार नै आफ्नो विचार लिखित रूपमा प्रस्तुत गरेका जनाएका छन् । प्रस्तुत विचारले पार्टीमा देखिएको समस्या, त्यसको जरो, पार्टीको सङ्कट र त्यसको सारतत्वका बारेमा छलफल हुनु र पार्टीको समस्या, सङ्कट तथा समाधान र निवारणका बारेमा छलफल हुनु स्वाभाविक भएको प्रवक्ता श्रेष्ठको भनाइ छ ।
बहसले पार्टीलाई एकता र गति पैदा गर्न सक्ने भन्दै प्रवक्ता श्रेष्ठले बैठमा प्रस्तुत भएका प्रस्तावमाथि पार्टी कमिटीमा हुने बहसको प्रक्रियाले पार्टीभित्र सकारात्मक योगदान गर्ने जिकिर गरे ।
यही मङ्सिर ३ गते बसेको सचिवालय बैठकले अध्यक्ष ओलीलाई आफ्नो विचार लिखित रूपमा प्रस्तुत गर्नका लागि सहमति प्रदान गरेको थियो ।
अध्यक्ष ओलीद्वारा प्रस्तावित प्रतिवेदनलाई अध्ययन गर्नका लागि थप तीन दिनको समय सचिवालय बैठकलाई दिइएको प्रवक्ता श्रेष्ठले बताए ।
उनकाअनुसार उक्त प्रतिवेदन अध्ययन गरेर तथा आवश्यक छलफल र गृहकार्य गरेर १६ गते आइतबार १ बजे पुनः सचिवालय बैठक पार्टी केन्द्रीय कार्यालय धुम्वाराहीमा बस्ने छ । अध्यक्ष ओलीले लिखित रूपमा प्रस्ताव पेश गरे पनि आफूहरुले हेर्न नपाएको उनले खुलासा गरे । प्रस्ताव हेर्न नपाए पनि पार्टीको अहिलेको समस्या, सङ्कट र त्यसलाई सामाधान गर्न छलफल बहस र अन्तरसङ्घर्षलाई सही दिशा दिनुपर्ने आवश्यकता प्रस्तावमा औँल्याइएको उनले जानकारी दिए ।
आजको सचिवालयको बैठकमा बोल्नुहुने अध्यक्ष ओली, अर्का अध्यक्ष पुष्पकमल दाहाल ‘प्रचण्ड’, वरिष्ठ नेता माधवकुमार नेपाल, झलनाथ खनाल र उपाध्यक्ष वामदेव गौतमले पार्टी एकताको रक्षामा जोड दिएका उनको भनाइ छ । पार्टी एकताको रक्षा र सुदृढीकरण गर्न अहिलेको छलफल र बहसलाई सदुपयोग गर्नुपर्छ भन्ने नेताहरुको समान धारणा रहेको प्रवक्ता श्रेष्ठले बताए ।
ओली र प्रचण्डका दुवै प्रस्तावमाथि अध्ययन गरेर आगामी सचिवालय बैठकमा छलफल गरिने बताइएको छ । दुवै प्रस्तावमाथि यही मङ्सिर १६ गते बस्ने सचिवालय बैठकमा छलफल हुने र त्यो दिन नसकिए अर्को दिन मङ्सिर १७ गते पनि गर्ने श्रेष्ठले बताए ।
ज्ञातव्य छ, नेकपाले यही मङ्सिर १८ गते स्थायी कमिटी र मङ्सिर २५ गते केन्द्रीय कमिटी बैठकको आयोजना गरेको छ ।
प्रतिक्रिया