• अर्जुनराज पन्त

आज फूल दियो
भोलि भुल्दियो

पर्सी अर्कैसङ्ग डुल्दियो
यस्तो चलन खै कस्ले हुल्दियो ?

अर्काको चलन जस्तो नि हुल्यो
आफ्नो सँस्कृति सबै भुल्यो !

दिल दिए पो दिगो हुन्थ्यो
एकअर्काको मनमा छुन्थ्यो

एउटाका कुरा अर्काले सुन्थ्यो
सङ्गै हाँस्थ्यो सङ्गै रुन्थ्यो

फूल दिएर ला’को माया
उत्तिखेरै दायाँ र बायाँ

फूल जस्तै फूस्स हुने
केको हुन्थ्यो दिल छुने !?

फूलमा जसरी भँमरा बस्छ
एउटा चुसेर अर्कामा पस्छ

छानी-छानी फूल ती डस्छ
उड्छ भँमरो फूलचाहिँ खस्छ

प्रेमलाइ बनाए अति सस्तो
त्यही फूल अनि भँमरा जस्तो !

फूलका बोटको नि सत्यानाश
प्रेम शब्दको उपहास !

दिवशका नाममा छरेर भ्रम
आकर्षणलाइ भन्यौ प्रेम

दीन-दुःखीमा छैन प्यार
हत्या हिंसा बलत्कार !

कस्तो बतासे चलन आयो
फूल दियो माया लायो !

दिल नसाँटि फूल साँट्यो
मनका कुरा सबै ढाँट्यो

ढाँटेका कुरा र साँटेको फूल
प्रेमका नाममा गर्दियो भूल !

एउटाको हतियारमा अर्काको पाइन
आयो बतासे भ्यालेन्टाइन !

– बाग्लुङ, मुलपानी

(कवि पन्त ब्यङग्यकाब्य कृति ‘कोइली’ का स्रष्टा हुन् ।)