महिला महामन्त्रीमा रेखा थापा कुन्ती शाहीसँग पराजित
राष्ट्रिय प्रजातन्त्र पार्टीको अध्यक्षमा राजेन्द्र लिङ्देन विजयी भएका छन् । एकता महाधिवेशनका क्रममा नयाँ कार्यसमिति चयनका लागि शनिबार भएको निर्वाचनमा लिङदेनले अध्यक्षका अर्का प्रत्याशी कमल थापालाई १९९ मत अन्तरले हराउँदै अध्यक्षमा निर्वाचित भएका हुन् । लिङदेन र थापाबीच कडा प्रतिस्पर्धा भए पनि अन्ततः लिङदेन विजयी बनेका हुन् । राप्रपाका झण्डै ४४ सय महाधिवेशन प्रतिनिधिमध्ये ३८ सय ७१ मत खसेकोमा लिङ्देनले १८१७ र थापाले १६१८ मत हासिल गरेका र ४३१ मत भने बदर भएको बताइएको छ ।
यस्तै, महामन्त्रीहरुमा धवलशम्शेर राणा, भुवन पाठक र कुन्ती शाही विजयी भएका छन् । राणा लिङदेन समूहका हुन् भने थापा र शाही कमल थापा समूहबाट निर्वाचनमा होमिएका थिए । कुन्ती शाहीलाई रेखा थापाले चुनौती दिएकी थिइन्, तर अन्ततः रेखा पराजित हुन पुगिन् । शाहीले २,००५ मत ल्याइन् भने थापालाई १६४० मत प्राप्त भएको जनाइएको छ ।
निर्वाचनबाट पार्टीअध्यक्षमा पराजित भएपछि कमल थापाले सामाजिक सञ्जालमार्फत लिङ्देनलाई बधाई दिएका छन् । पराजयबाट रन्थनिएका थापाले आफ्नो हारका लागि निर्मल निवासमाथि दोष थोपर्दै ब्यंग्यात्मक शैलीमा राजा ज्ञानेन्द्रलाई समेत बधाई दिएका छन् ।
प्रतिक्रिया