४४ अर्ब डलरमा एलोन मस्कले ट्वीटर अधिग्रहण गरेसँगै गत शुक्रबार आफ्ना करिब आधा कर्मचारीहरूलाई हटाएपछि जागिर गुमाएका दर्जनौँ कर्मचारीहरूलाई ट्वीटर कम्पनीले पुन: सम्पर्क गर्दैछ । ब्लुमबर्ग न्युजले जनाएअनुसार कम्पनीले केही कर्मचारीलाई फेरि काममा फर्किन आग्रह गरिरहेको छ ।

फिर्ता हुन भनिएका केहीलाई गल्तीले कामबाट निकालिएको भन्ने तर्क दिइएको थियो । इलोन मस्कले कल्पना गरेका नयाँ सुविधाहरू निर्माण गर्न उनीहरूको काम र अनुभव आवश्यक हुनसक्छ भन्ने कुरा व्यवस्थापनले महसूस गर्नुअघि अन्य कर्मचारीलाई जान अनुमति दिइएको थियो ।

ट्विटरले भर्खरै ट्रस्ट र सेफ्टी टिमका कर्मचारीसहित आफ्ना ५० प्रतिशत कर्मचारीहरूलाई हटाएको कम्पनीको सुरक्षा र अखण्डताका प्रमुख योएल रोथले यस हप्ताको सुरुमा ट्वीटमा भनेका थिए ।